Андижон вилояти ҳудудида “Долзарб 40 кунлик” махсус профилактик тадбирлари доирасида бир қатор жиноят олами вакиллари, товламачилар, ўзидан “Етакчи” ясаб олганлар ҳамда уларга яқин бўлган шахслар ушланмоқда, деб хабар берди вилоят ИИБ матбуот хизмати.
Хусусан, 2 декабрь куни ўтказилган тезкор-қидирув тадбирлари давомида, муқаддам судланган уч киши ушланган:
- муқаддам Жиноят кодексининг 219 (ҳокимият вакилига ёки фуқаровий бурчини бажараётган шахсга қаршилик қилиш), 238 (ёлғон гувоҳлик бериш), 241 (жиноят ҳақида хабар бермаслик ёки уни яшириш), 165-моддаларида (товламачилик) назарда тутилган жиноятларни содир этгани учун бир неча маротаба судланган, Андижон туманида яшовчи, 1985 йилда туғилган Байханов Нофар Алишерович,
- муқаддам Жиноят кодексининг 97 (қасддан одам ўлдириш), 164 (босқинчилик), 165-моддаларида (товламачилик) назарда тутилган жиноятларни содир этганлиги учун бир неча маротаба судланган, Андижон шаҳрида яшовчи,1989 йилда туғилган Умаров Умидбек Рафукжонович,
- муқаддам Жиноят кодексининг 159-моддасида (Конституциявий тузумга тажовуз қилиш) назарда тутилган жиноятни содир этганлиги учун судланган, Қўрғонтепа туманида яшовчи, 1961 йилда туғилган Мамажанов Дилмурод Адхамжанович.
Улар вилоят ҳудудида майда безорилик, товламачилик, кучли таъсир қилувчи ёки заҳарли моддаларни қонунга хилоф равишда муомалага киритиш, гиёҳвандлик воситаларини қонунга хилоф равишда ўтказиш билан боғлиқ жиноятларни содир этгани аниқланган.
Ҳурматли фуқаролар! Агар Сизлар ушбу шахслардан жабр кўрган бўлсангиз ёки ушбу шахсларнинг жиноий хатти-ҳаракатлари бўйича маълумотларга эга бўлсангиз, Андижон вилояти ИИБнинг 102 рақами ёки 97-432-10-20 телефон рақамига мурожаат қилишингизни сўраймиз. Мурожаатчининг шахси сир сақланиши кафолатланади, — дейилади хабарда.
Айни пайтда тегишли ҳужжатлар расмийлаштирилиб, Жиноят кодексининг 165, 251-1, 273-моддаларига асосан қўзғатилган жиноят ишлари доирасида тергов ҳаракатлари олиб борилмоқда.
Бундан аввал Наманган вилояти ҳудудида тезкор-профилактик тадбирларнинг “долзарб 40 кунлиги” доирасида тергов ва суд органларидан яшириниб юрган 35 нафар шахс ушлангани ҳақида хабар берилган эди.
Изоҳ (0)