Гиёҳвандлик воситаларининг ноқонуний айланмасига қарши курашиш доирасида Давлат хавфсизлик хизматининг Андижон вилояти бўйича бошқармаси ходимлари томонидан бошқа ҳуқуқни муҳофаза қилувчи идоралар билан ҳамкорликда бир нечта тезкор тадбирлар ўтказилди.
Хусусан, Андижон шаҳрида яшовчи, 35 ёшли фуқаро бошқарувидаги Equinox автомашинаси Олтинкўл туманида тўхтатилиб, кўздан кечирилганда, унинг салон қисмида 1 килограмм 988 грамм гашиш моддаси борлиги аниқланиб, тегишли тартибда расмийлаштириб олинган.
Тезкор суриштирув ҳаракатлари давомида, Андижон шаҳрида яшовчи, муқаддам гиёҳвандлик воситалари савдоси билан боғлиқ жинояти учун судланган 34 ёшли шахс ушбу гашишни Тожикистондаги наркосавдогарлардан 5,5 минг доллар эвазига Наманган вилоятининг Поп тумани ҳудудига келтириб бериш шарти билан сотиб олгани аниқланиб, у ҳам процессуал тартибда қўлга олинган.
Ўз навбатида Equinox автомашинаси эгаси ушбу гиёҳвандлик воситасини тожикистонлик наркокурерлар томонидан қолдириб кетилган хуфия жойдан олиб, жиноий шеригининг ёнига кетаётган бўлган.
Бошқа ҳолатда эса Қирғизистондан гиёҳвандлик воситаларини олиб келиб, сотиш билан шуғулланган икки нафар шахс ушланган. Хусусан, Жалақудуқ туманида яшовчи, 46 ёшли фуқаро 100 грамм гашиш моддасини Андижон шаҳрида истиқомат қилувчи 49 ёшли жиноий шеригига олиб кетаётган вақтида қўлга олинган.
Шунингдек, унинг яшаш хонадонидан 586 грамм гашиш, жиноий шериги уйидан эса 19 грамм гашиш моддаси процессуал тартибда расмийлаштириб олинган.
Андижон шаҳрида яшовчи, муқаддам судланган шахс эса ўз ўғлининг бошқарувида бўлган Киа автомашинасида Тошкент шаҳри томон ҳаракатланаётган вақтида Бўстон туманидаги 44-сонли ЙПХ масканида тўхтатилган.
Автомашина холислар иштирокида кўздан кечирилганида, унинг салон қисмида Қирғизтондан келтирилган 673 грамм гашиш моддаси ҳамда 42 дона кучли таъсир қилувчи дори воситалари борлиги аниқланиб, процессуал тартибда расмийлаштириб олинган. Шунингдек, унинг яшаш хонадонидан ҳам 14 дона кучли таъсир қилувчи дори воситалари олинган.
Андижон шаҳрида қайд этилган яна бир ҳолатда, муқаддам судланган 54 ёшли шахс Қирғизистондан наркотик моддалар олиб келиб, сотишини бошқалардан сир тутиш мақсадида, шаҳарнинг бошқа ҳудудидан ижарага уй олгани аниқланган.
Унинг ижарага олган хонадони кўздан кечирилганда, келгусида сотиш мақсадида сақлаб келинаётган жами 269 грамм гашиш моддаси ва 1 дона электрон тарози борлиги аниқланиб, тегишли тартибда ҳужжатлаштириб олинган.
Ҳозирда барча ҳолатлар юзасидан мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Изоҳ (0)