Андижонда Қирғизистондан олиб келинган гашишни 1,6 минг долларга сотмоқчи бўлган 37 ёшли аёл ушланди (видео)

"Давлат хавфсизлик хизмати ходимлари томонидан республика бўйлаб гиёҳвандлик воситалари савдосига қарши тадбирлар ўтказилди", деб хабар беради ЎзА.

Давлат хавфсизлик хизматининг Сирдарё вилояти бўйича бошқармаси ходимлари томонидан вилоят божхона ва ички ишлар бошқармалари билан ҳамкорликда ўтказилган тезкор тадбирда Сурхондарё—Тошкент йўналишида ҳаракатланаётган, Денов шаҳрида яшовчи 43 ёшли фуқаро бошқарувидаги Lacetti русумли автомашина “Сирдарё” ЙПХ масканида тўхтатилиб, текширилган.

Натижада автомашина салонида 999 грамм гашиш моддаси борлиги аниқланиб, процессуал тартибда расмийлаштириб олинган. Аниқланишича, мазкур шахс муқаддам гиёҳвандлик воситалари савдоси билан боғлиқ жинояти учун жазо муддатини ўтаган.

Бошқа бир ҳолатда эса 55 ёшли Қирғизистон фуқароси 395 грамм гашиш моддасини контрабанда йўли билан Ўзбекистонга олиб келиб, Олтинкўл туманида яшовчи 37 ёшли аёл билан биргаликда уни сотишни режалаштирган.

ДХХ Андижон вилояти бўйича бошқармаси ҳамда вилоят ИИБ ходимлари ҳамкорлигида ўтказилган тезкор тадбирда улар 186 грамм гашишни Андижон шаҳрида яшовчи, 1963 йилда туғилган, муқаддам судланган шахсга 1,6 минг АҚШ долларига сотишга келишиб, олдиндан 600 АҚШ доллари олган вақтларида қўлга олинган. Шунингдек, аёлнинг уйидан наркотик модданинг қолган 209 грамм қисми ҳам тегишли тартибда расмийлаштириб олинган.

ДХХ Тошкент шаҳар бўйича бошқармаси ходимлари томонидан бошқа ҳуқуқни муҳофаза қилувчи органлар билан ҳамкорликда ўтказилган тезкор тадбирда пойтахт ҳудудида кучли таъсир қилувчи дори воситаларининг ноқонуний савдоси билан шуғулланувчи 3 нафар шахс ушланиб, улардан 19 340 дона “Зардекс” дори воситаси процессуал тартибда расмийлаштириб олинди.

Аниқланишича, ушбу дори воситалари Қирғизистондан олиб келинган.

Бундан ташқари, Қибрай туманида яшовчи, 1991 йилда туғилган, муқаддам судланган шахс бошқарувидаги Lacetti русумли автомашина пойтахтнинг Мирзо Улуғбек тумани ҳудудида ҳаракатланаётган вақтида ДХХ Тошкент вилояти бўйича бошқармаси, шаҳар ИИББ Йўл-патрул хизмати ҳамда Миллий Гвардия ходимлари томонидан тўхтатилиб, кўздан кечирилган.

Натижада автомашина салонида Қирғизистондан келтирилган 1 666 дона “Регапен” ва 134 дона “Тропикамид” кучли таъсир қилувчи дори воситалари борлиги аниқланиб, ўрнатилган тартибда расмийлаштириб олинган.

Ҳозирда барча ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.