Андижонда гиёҳванд модда истеъмол қилиб келган аёл 3 йил муддатга озодликдан маҳрум қилинди

Жиноят ишлари бўйича Андижон шаҳар суди доимий равишда гиёҳванд моддалар истеъмол қилиб юрувчи аёлга ҳукм ўқиди. Бу ҳақда «Дарё»га вилоят суди ахборот хизмати хабар берди.

«Менда бронхиал астма, нафас етишмовчилиги касаллиги мавжуд. Шу сабабли бир неча йилдан буён ‘Трамадол’, ‘Лирика’ ва ‘Тропикамид’ каби дори моддаларини ичиб келаман. Ушбу дориларни ичсам ўзимни яхши хис қиламан. Лекин дориларни ичиш бўйича ҳеч қандай шифокорнинг тавсияси йўқ. Бир танишим шу дориларни ичиб турсам яхши бўлишимни тавсия қилгани учун фойдаланаман. Шунинг учун ҳам уларни доимий равишда ёнимда, сумкамда ва машинамда олиб юраман. Тирикчилик қилиш мақсадида маиший техникалар савдоси билан шуғулланаман ва насияга тардбиркорларга тарқатиб сўнг пулини йиғиб юраман. Ўзим сотган телевизор ва шунга ўхшаш нарсаларимнинг пулларини олиш мақсадида Андижон шаҳри Янги бозор тарафда жойлашган ноқонуний дори бозори ёнига келганимда, ИИБ ходимлари ёнимга келиб, ўзимни шубҳали тутганимни айтиб, холислар иштирокида кўздан кечирганларида сумкамдан  дори воситалари борлиги аниқланди. Бундан ташқари ўзим ИИБ ходимларига яна бошқа дориларим борлигини айтиб, топширдим. Бу дориларни сотиш ниятим бўлмаган. Қилмишимдан пушаймонман, енгиллик беришингизни сўрайман», — деган судланувчи ўз кўрсатмасида.

Ишни кўриб чиққан судья Сардор Расулов М.Н.ни Жиноят кодексининг 276-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) 2-қисми «а» банди билан айбли деб топиб, унга нисбатан 3 йил 1 ой муддатга озодликдан маҳрум қилиш жазоси тайинлаган.

Шунингдек, наркология экспертизасида унинг таксикомания 1-босқич трамадол гиёҳвандлик касаллиги билан оғриши ва мажбурий даволанишга муҳтожлиги кўрсатилгани сабабли жазони ўташ даврида Жиноят кодексининг 96-моддаси тартибида гиёҳвандлик касаллигидан мажбурий даволаниш чоралари қўлланилиши белгилаб қўйилган.