Бугун, 18 ноябрь куни Олий Мажлис Қонунчилик палатасининг янги таркибдаги биринчи мажлиси бўлиб ўтди Йиғилишда Нуриддин Исмоилов қуйи палата спикери лавозимига сайланди.
Бу — Исмоиловнинг ушбу лавозимга учинчи маротаба сайланиши. У илк бор 2015 йилнинг январида Дилором Тошмуҳамедова ўрнини эгаллаган бўлса, 2020 йилнинг январида лавозимига қайта сайланган эди.
Ижтимоий тармоқларда эса Ўзбекистоннинг янгиланган конституциясидан олинган иқтибос (“Айни бир шахс сурункасига икки муддатдан ортиқ Ўзбекистон Республикаси Олий Мажлиси Қонунчилик палатасининг спикери бўлиши мумкин эмас” — 100-модда) кенг муҳокама қилиняпти. Бу эса Исмоиловнинг учинчи бор ушбу лавозимга сайланиши қонуний ёки ноқонунийлиги ҳақидаги баҳс-мунозараларга сабаб бўлган.
Гап шундаки, 2023 йилнинг 1 январида қабул қилинган “Ўзбекистон Республикаси конституцияси тўғрисида”ги конституциявий қонунга кўра, Нуриддин Исмоиловнинг ушбу лавозимга сайлангани мутлақо қонуний. Қонуннинг 7-моддасида “Қонун кучга кирган пайтда кўрсатилган лавозимларни эгаллагани ва (ёки) эгаллаб келаётганининг сурункали муддатлари сонидан қатъи назар, бошқа фуқаролар билан тенг равишда мазкур лавозимларга сайланишга ҳақли” экани белгиланган. Содда қилиб айтганда, Исмоилов келгусида яна бир марта ушбу лавозимга сайланиш ҳуқуқига эга.
Худди шу тартиб ҳокимларга нисбатан ҳам қўлланади. Айни қонун қабул қилингандан сўнг лавозимга тайинланган ҳокимлар икки муддат давомида ушбу лавозимда қолишлари мумкин. Аввалги муддатлар эса ноллаштирилган.
Изоҳ (0)