Эрон президенти Иброҳим Раисий ҳукумати сентябр ойида Ўзбекистон билан имзолаган 18 га яқин англашув меморандумларини тезроқ амалга ошириш зарурлигини таъкидлаб, уларни икки давлат ўртасидаги иқтисодий алоқаларни кенгайтириш учун зарур деб баҳолади. Бу ҳақда IRNA ахборот агентлиги хабар берди.
Раисий тегишли баёнотни расмий ташриф билан Теҳронда бўлиб турган Олий Мажлис Қонунчилик палатаси Спикери Нурдинжон Исмоилов билан учрашувда айтиб ўтди.
“Ўтган йил давомида Эрон ва Ўзбекистон ўртасидаги сиёсий ва иқтисодий муносабатларнинг ривожланиши муносабатларнинг мавқеини ўзгартирган бўлса-да, икки давлатдаги мавжуд имкониятлар биздан икки томон ўртасидаги иқтисодий ва тижорат алоқаларини янада ривожлантириш бўйича саъй-ҳаракатларимизни фаоллаштиришни талаб қилади”, — деди у.
Раиси Шанхай ҳамкорлик ташкилоти саммитида иштирок этиш учун сентябр ойида Самарқандга ташриф буюрган эди. Ташрифда унга ҳамроҳлик қилаётган вазирлар ва ҳукумат идоралари ўзбекистонлик ҳамкасблари билан ҳамкорликнинг турли йўналишлари, жумладан, савдо-сотиқ, нефть-газ, юк транзити, технология ва туризмни қамраб олган 18 та ҳужжат имзолаган.
Раисий Исмоилов билан учрашувда, шунингдек, Эрон ва Ўзбекистон парламентлари икки халқ ўртасидаги ҳамкорликни ривожлантиришда муҳим рол ўйнашини айтди.
Ўз навбатида, Исмоилов Эрон президентининг Эронга қўшни давлатлар билан муносабатларни ривожлантиришга устувор аҳамият қаратган ташқи сиёсатини юқори баҳолаб, Ўзбекистон ҳам ўзининг янги Конститусиясида қўшни давлатлар билан алоқаларни ривожлантиришга катта эътибор қаратганини билдирди.
Изоҳ (0)