11 февраль куни Jurabek Laboratories МЧЖ қўшма корхонасида тайёрланган ZF-UZ-VAC2001 вакцинасининг 910 330 дозаси эмлаш учун топширилди. Бу ҳақда ССВ матбуот хизмати хабар берди.
Шундай қилиб, Ўзбекистонда фойдаланилаётган вакциналар миқдори 50 757 148 дозани ташкил қилмоқда. Улардан:
- 2 404 480 дозаси AstraZeneca;
- 38 700 268 дозаси ZF-UZ-VAC2001;
- 1 341 790 дозаси «Спутник V»;
- 3 500 460 дозаси Moderna;
- 2 626 650 дозаси Pfizer/BioNTech;
- 1 976 000 дозаси Sinovac;
- 207 500 дозаси Sputnik Light вакцинасидир.
Эслатиб ўтамиз, Jurabek Laboratories томонидан ишлаб чиқарилган ўзбек-хитой вакцинасининг 1 458 820 дозадан иборат биринчи партияси 2021 йилнинг 30 сентябрь куни топширилганди. 13 октябрь куни ZF-UZ-VAC2001 вакцинасининг иккинчи партияси ишлаб чиқарилган ва Санитария-эпидемиологик осойишталик ва жамоат саломатлиги хизматига етказиб берилган эди. 21 октябрда эса Ўзбекистонда ишлаб чиқарилган ZF-UZ-VAC2001 вакцинасининг 2,7 миллиондан ортиқ дозаси эмлаш учун топширилган.
Мавзуга доир:
Эслатиб ўтамиз, июль ўрталарида Ўзбекистонда 18 ёшдан ошган 14 та тоифадаги фуқаролар коронавирусга қарши эмланиши шарт этиб белгиланди. Улар орасида аҳоли билан мулоқотга кирувчи барча турдаги хизмат кўрсатиш объектларининг (давлат хизматлари марказлари, почта бўлинмалари, банклар, лизинг ташкилотлари, нотариуслар, суғурта компаниялари, гўзаллик салонлари, сартарошхоналар ва бошқаларнинг) ходимлари ҳам бор. Олий Мажлис Қонунчилик палатаси спикери Нурдинжон Исмоилов Ўзбекистонда аҳолини мажбурий эмлаш қонунга зид экани ва шундай бўладиган тақдирда ҳуқуқий ҳужжатларга белгиланган тартибда ўзгартиш ёки қўшимчалар киритиш талаб этилишини айтганди.
Президент Шавкат Мирзиёев эса 28 июль куни бўлиб ўтган видеоселектор йиғилишида Ўзбекистондаги эпидемиологик ҳолат ёмонлашганини қайд этиб ўтиб, аҳолини COVID-19 га қарши эмланишга чақирганди. «Вакцина олганлар шифохонадан тўрт кунда чиқяпти, эмланмаганларга эса жуда оғир бўляпти. Ҳа, вакцина олгандан кейин касалланиш мумкин, лекин касаллик енгил формада кечяпти», — деди давлат раҳбари ва ҳокимларга вакцинация бўйича ишларни қаттиққўллик билан назоратга олишни топширганини ҳам таъкидлаб ўтган.
Изоҳ (0)