Ўзбекистонда қанча депутат коронавирусга қарши эмлангани маълум бўлди
Олий Мажлис Қонунчилик палатасининг ялпи мажлисида Қонунчилик палатаси спикери Нурдинжон Исмоилов қуйи палата депутатлари орасида коронавирусга қарши вакцина олганлар сонини очиқлади.
Фото: «Дарё»
«Айни пайтда ушбу инфекцияга қарши курашда энг самарали тадбирлардан бири эмлаш эканини, бундан бошқа чора йўқлигини соҳа олимлари эътироф этмоқда. Шунга қарамасдан ҳозирги кунга қадар қуйи палата депутатларининг 70 нафари ихтиёрий равишда эмланган холос.
Қолган 75 нафар депутат коронавирусга қарши вакцина олмагани, шунингдек, қуйи палата девони ходимлари ўртасида эмланганлар сони камлиги ҳам салбий ҳолат, албатта», – дея таъкидлади спикер.
Исмоилов бу ишда аввало ҳар бир инсон ўзи намуна бўлиши кераклигини таъкидлади.
«Аслида биз, тиббиёт ходимлари ишини кўпайтирмасдан, оиламиз, яқинларимиз, ҳамкасбларимиз ва дўстларимиз ҳаётини хавфга қўймасдан, аввало, ўзимиз намуна бўлишимиз лозим. Қолаверса, коронавирусга қарши эмлаш бўйича тарғибот-ташвиқот олиб боришимиз, унинг ижобий самарасини аҳолининг барча қатламларига кенг тушунтиришимиз зарур», — деди спикер Нурдинжон Исмоилов.
Эслатиб ўтамиз, Соғлиқни сақлаш вазирлиги 26 июнь куни «Мен вакцина олдим» акцияси бошланганини эълон қилди. Акция доирасида вазирлик матбуот хизмати деярли ҳар куни вакцина олган юқори мартабали ўзбекистонликлар ҳақида ахборот бериб келмоқда. Улар орасида катта тиббиёт муассасалари раҳбарларидан тортиб, вилоят ҳокими-ю вазирларгача бор.
Бундан аввал Ўзбекистонда коронавирусга қарши қўлланилган вакциналар сони 5,5 млн дозадан ошгани, МДҲ мамлакатлари бир-бирларининг COVID-сертификатларини тан олишни бошлаши мумкинлиги ҳамда Ўзбекистонда ҳозирга қадар коронавирусга қарши тўлиқ эмланганлар сони 985 минг кишидан ошгани ҳақида хабар бермоқда.
Изоҳ (0)