Bugun, 18-noyabr kuni Oliy Majlis Qonunchilik palatasining yangi tarkibdagi birinchi majlisi bo‘lib o‘tdi Yig‘ilishda Nuriddin Ismoilov quyi palata spikeri lavozimiga saylandi.
Bu — Ismoilovning ushbu lavozimga uchinchi marotaba saylanishi. U ilk bor 2015-yilning yanvarida Dilorom Toshmuhamedova o‘rnini egallagan bo‘lsa, 2020-yilning yanvarida lavozimiga qayta saylangan edi.
Ijtimoiy tarmoqlarda esa O‘zbekistonning yangilangan konstitutsiyasidan olingan iqtibos (“Ayni bir shaxs surunkasiga ikki muddatdan ortiq O‘zbekiston Respublikasi Oliy Majlisi Qonunchilik palatasining spikeri bo‘lishi mumkin emas” — 100-modda) keng muhokama qilinyapti. Bu esa Ismoilovning uchinchi bor ushbu lavozimga saylanishi qonuniy yoki noqonuniyligi haqidagi bahs-munozaralarga sabab bo‘lgan.
Gap shundaki, 2023-yilning 1-yanvarida qabul qilingan “O‘zbekiston Respublikasi konstitutsiyasi to‘g‘risida”gi konstitutsiyaviy qonunga ko‘ra, Nuriddin Ismoilovning ushbu lavozimga saylangani mutlaqo qonuniy. Qonunning 7-moddasida “Qonun kuchga kirgan paytda ko‘rsatilgan lavozimlarni egallagani va (yoki) egallab kelayotganining surunkali muddatlari sonidan qat’i nazar, boshqa fuqarolar bilan teng ravishda mazkur lavozimlarga saylanishga haqli” ekani belgilangan. Sodda qilib aytganda, Ismoilov kelgusida yana bir marta ushbu lavozimga saylanish huquqiga ega.
Xuddi shu tartib hokimlarga nisbatan ham qo‘llanadi. Ayni qonun qabul qilingandan so‘ng lavozimga tayinlangan hokimlar ikki muddat davomida ushbu lavozimda qolishlari mumkin. Avvalgi muddatlar esa nollashtirilgan.
Izoh (0)