Тошкент вилояти Санитария-эпидемиологик осойишталик ва жамоат саломатлиги бошқармаси ва ҳудудий бўлимлари томонидан вилоятда коронавирусга қарши эмланмаган фуқаролар аниқланиб, уларга қарши чора кўрилмоқда. Бу ҳақда СЭОМ матбуот хизмати хабар берди.
Маълум қилинишича, аҳоли орасида қанчалик тушунтириш тадбирлари ташкил этилишига қарамасдан Тошкент вилояти Санитария-эпидемиологик осойишталик ва жамоат саломатлиги бошқармаси ва ҳудудий бўлимлари томонидан вилоятда 1863 та текшириш тадбирлари ташкил этилган вақтда 6526 нафар фуқаро вакцина олмагани аниқланган. Улардан 1402 нафари тадбиркорлик субъектлари ва 5035 нафари эса бюджет ташкилотларида меҳнат фаолиятини олиб бораётган фуқаролардир.
«Бу каби фуқароларга, албатта, қонунчиликда белгиланган талабларга амал қилмагани учун қонуний чоралар кўрилди. Бундай ҳолатлар Тошкент вилоятида 3608 тани ташкил этади. Булар орасида 3229 нафар ходим вақтинча ишдан четлаштирилган, 374 нафари тегишли тартибда жаримага тортилган бўлса, бештаси фаолияти тўхтатилган объектлардир», — дейилади хабарда.
Санитария-эпидемиологик осойишталик ва жамоат саломатлиги COVID-19 га қарши эмланиш мажбурий қилиб белгилангани, бу каби қонунларга амал қилмаслик ҳолатлари устидан қаттиқ назорат тадбирлари олиб борилишини қайд этган.
Маълумот учун, мамлакатда аҳолини коронавирусга қарши эмлаш тадбирлари 1 апрелдан бошланди. Эмлаш ихтиёрий ва бепул, февраль ойида вакцина олишдан бош тортганларга ҳеч қандай чора кўрилмаслиги айтилганди. Июнь охиридан бошлаб эса Тошкентда 18 ёшдан ошганлар коронавирусга қарши оммавий эмлаш бошланган.
Эслатиб ўтамиз, июль ўрталарида Ўзбекистонда 18 ёшдан ошган 14 та тоифадаги фуқаролар коронавирусга қарши эмланиши шарт этиб белгиланди. Улар орасида аҳоли билан мулоқотга кирувчи барча турдаги хизмат кўрсатиш объектларининг (давлат хизматлари марказлари, почта бўлинмалари, банклар, лизинг ташкилотлари, нотариуслар, суғурта компаниялари, гўзаллик салонлари, сартарошхоналар ва бошқаларнинг) ходимлари ҳам бор. Олий Мажлис Қонунчилик палатаси спикери Нурдинжон Исмоилов Ўзбекистонда аҳолини мажбурий эмлаш қонунга зид экани ва шундай бўладиган тақдирда ҳуқуқий ҳужжатларга белгиланган тартибда ўзгартиш ёки қўшимчалар киритиш талаб этилишини айтганди.
Президент Шавкат Мирзиёев эса 28 июль куни бўлиб ўтган видеоселектор йиғилишида Ўзбекистондаги эпидемиологик ҳолат ёмонлашганини қайд этиб ўтиб, аҳолини COVID-19 га қарши эмланишга чақирганди. «Вакцина олганлар шифохонадан тўрт кунда чиқяпти, эмланмаганларга эса жуда оғир бўляпти. Ҳа, вакцина олгандан кейин касалланиш мумкин, лекин касаллик енгил формада кечяпти», — деди давлат раҳбари ва ҳокимларга вакцинация бўйича ишларни қаттиққўллик билан назоратга олишни топширганини ҳам таъкидлаб ўтган.
Изоҳ (0)