Олий Мажлис Қонунчилик палатаси депутатлари «Ичимлик суви таъминоти ва оқава сувларни чиқариш тўғрисида»ги қонунни қабул қилди. Эндиликда у Сенат томонидан тасдиқланиши керак, деб хабар беради «Gazeta.uz».
Ҳужжат муҳокамаси чоғида депутат Расул Кушербаев сув ҳисоблагичлари кимнинг ҳисобидан ўрнатилиши — истеъмолчими ёки корхонами, деган саволни берган. Ҳозирда сув ҳисоблагичларини харид қилиш, ўрнатиш, давлат кўригидан ўтказиш ва улардан фойдаланиш истеъмолчилар маблағлари ҳисобидан амалга оширилмоқда. Депутат Бекмирза Эшмурзаев истеъмолчиларнинг кўрсаткичлар бўйича етказиб берувчига хабар қилиш мажбурияти ҳақида сўраган.
«Ўзсувтаъминот» бошқаруви раиси Соҳиб Саифназаровнинг айтишича, ҳозирда газ ва электр ҳисоблагичлари ҳақиқатан ҳам таъминотчи корхоналар, сув ҳисоблагичлари эса истеъмолчилар ҳисобидан ўрнатилмоқда.
«Шу йилдан бошлаб янги қурилаётган объектларда ўзимиз сметага киритиб, ҳисоблагичларни ўрнатяпмиз. Яъни икки хил усул кетмоқда. Иккинчидан, ҳозир газда ҳам, электр энергиясида ҳам онлайн ҳисоблагичлар қўйилмоқда. Шунинг учун истеъмолчига ҳар ой ёки ҳар икки ойда бир марта кўрсаткичларни топшириш шартмас. Бизда лекин ҳисоблагичларнинг аксарият қисми механик ҳисоблангани учун текшириш мақсадида бу нарса керак», — дейди у.
«Бу нима учун керак? Агар бу кўрсаткичлар кирмаса, автомат равишда норматив бўйича ўртача кунлик сув истеъмоли бўйича ҳисоб-китоб кетади… Тошкентда, канализация бор жойда киши бошига кунига 120−130 литр ҳисобланади», — деди Соҳиб Саифназаров.
Парламент қуйи палатаси спикери Нурдинжон Исмоилов қонун лойиҳасидаги «ўз вақтида» сўзини «келишувда кўрсатилган муддат» билан алмаштиришни таклиф қилган.
«Ўзсувтаъминот» раҳбарининг айтишича, Франциянинг Suez International компанияси билан биргаликда 2022 йилдан бошлаб Тошкентда сув кўрсаткичларини онлайн ўқий оладиган ва тўлов амалга оширилмаган тақдирда сув таъминотини тўхтатиб туриш имконини берувчи интеллектуал сув ҳисоблагич тизимини жорий этиш режалаштирилган.
Соҳиб Саифназаров, шунингдек, сув ҳисоблагичини давлат текширувидан ўтказиш учун истеъмолчи «Ягона дарча»га мурожаат қилиши, кейин эса «Ўзсувтаъминот» (ёки «Ўзстандарт» томонидан аккредитациядан ўтган бошқа ташкилот) ҳисоблагичнинг метрологик меъёрларга мувофиқлигини текшириб кўришини ҳам таъкидлаган.
Шунингдек, у абонент ва сув таъминоти хизматларини кўрсатувчи провайдернинг фавқулодда вазиятларда жавобгарлиги соҳаси ҳақидаги саволга жавоб берган.
«Кўп қаватли уйга кираверишгача бизнинг ҳудуд ҳисобланади, лекин уйнинг ичи бўлса, у ер уй-жой мулкдорлари ширкатларига ёки бошқарув компаниясига қарайди, улар аварияларни бартараф қилишлари керак. Ҳовли ичида бўлса, абонентнинг ўзи бу нарсани бартараф қилади… Хизматларни қилишимиз мумкин, лекин бу алоҳида шартнома асосида қилинадиган нарса», — дейди «Ўзсувтаъминот» раҳбари.
Депутатнинг таъкидлашича, ҳозирда «истеъмолчи сув ҳисоблагичини ўзи сотиб олади, ўзи кўрикдан ўтказади, кўрсаткичларни ҳам ўзи олиши керак».
«Амалиётдан битта мисолни айтай. Шахсан ўзимнинг ўз вақтида қиёсловдан ўтказиш эсимдан чиқиб кетган экан. Менга ҳеч ким огоҳлантириш ҳам бермади. Орада бирданига жуда катта қарздорлик келиб чиқди. Борсам, бир йилдан ортиқ ўтиб кетган экан. Мен нега огоҳлантириш бермадингиз, деб айтдим. Ўзингиз билишингиз керак эди, дейди. Майли, нима бўлганда ҳам, энг қизиғи, ҳозир бориб қиёслов кўригидан ўтказиш учун аризани сув таъминоти корхонасига берсангиз, олмайди ўзи. Уни овора бўлиб қайтадан Давлат хизмати марказига олиб борасиз. У орқали пулини тўлаб, қиёслов кўрикка ариза бериб, яна қайтадан сув таъминотига келиб тўловни қиласиз. Яъни қулайлаштириш ўрнига умуман ноқулайлик қилиб қўйилган», — дейди у.
Парламентарий сув таъминоти корхонаси ҳисоблагичларни ўрнатишдан манфаатдор бўлиши кераклигини ҳам таъкидлаган. Шунингдек, у «Ўзсувтаъминот» компанияси истеъмолчиларни икки тоифага бўлаётганини, яъни компаниянинг ўзи айрим абонентларга (юқорида таъкидланган янги уйлар эгалари назарда тутилмоқда — таҳр.) ҳисоблагич ўрнатаётганини, бошқалари эса бунинг учун пул тўлашини танқид қилган.
Соҳиб Саифназаровнинг айтишича, корхонанинг ўзи ҳисоблагичларни ўрнатишга тайёр, аммо кейин «барча харажатлар тарифларга киритилиши керак».
«Тарифларни ҳам депутатлар тасдиқлашади. Марҳамат, биз бунга тайёрмиз», — дейди у.
Якунда қонуннинг муҳокама қилинган моддаси депутат томонидан киритилган таклифлар ҳисобга олинмаган ҳолда маъқулланди (120 депутат ёқлади, 1 нафари бетараф қолди, 7 нафари овоз бермади). Қонунни 123 та «ҳа» ва 1 та «йўқ» овоз билан маъқулланди.
Кейинроқ Расул Кушербаев ўзининг Telegram-каналида «қанча ҳаракат қилмайлик сув таъминоти масаласида янги Ўзбекистондаги эскича қараш қолди», деб ёган.
«Яъни, сув ҳисоблагичларни ўрнатиш, ҳисобини юритиш, аварияни бартараф этиш ва ҳоказо мажбуриятлар сув таъминоти корхонаси эмас, истеъмолчи бўйнига илинди. Давлат бюджетидан миллиардлаб пул олиб, ортга қайтармайдиган, бироқ истеъмолчи учун битта ҳисоблагич ўрнатишни бўйнига олмайдиган тармоқнинг истеъмолчилар билан шартнома асосида тенг шартларда ишлаймиз, дейиши абсурддан бўлак нарсамас», — дейди у.
Эслатиб ўтамиз, Ўзбекистонда сув таъминоти тизимини яхшилаш бўйича Франция компанияси билан бирга 185,4 миллион евролик лойиҳа амалга оширилиши 2020 йилнинг июнида маълум бўлганди.
Аввалроқ ЕТТБ Наманган вилоятида ичимлик суви таъминотини яхшилашга 70 млн доллар ажратиши, Ўзбекистонда аҳолининг сувдан қарздорлиги 555,8 млрд сўмга етгани тўғрисида хабар берилганди.
Изоҳ (0)