5 ноябрь куни Халқ депутатлари Самарқанд, Навоий, Жиззах ва Хоразм вилоятлари кенгашларининг еттинчи чақириқ биринчи сессиялари бўлиб ўтди.
Сессияларда халқ депутатлари вилоятлар кенгашларига сайланган депутатларнинг партия гуруҳлари рўйхатдан ўтказилиб, вилоятлар кенгашининг регламенти ва доимий комиссиялар тўғрисидаги низомлари тасдиқланган. Шунингдек, президент тақдимномасига асосан вилоят ҳокими лавозимига тавсия этилган номзодлар кўриб чиқилиб, тасдиқланган.
Янги таҳрирдаги Ўзбекистон Республикаси конституциясининг 120-моддасига асосан вилоят, туман, шаҳар ҳокими лавозимини эгаллаб турган шахс бир вақтнинг ўзида халқ депутатлари кенгашининг раиси лавозимини эгаллаши мумкин эмас.
Шу муносабат билан “Маҳаллий давлат ҳокимияти тўғрисида”ги қонунга мувофиқ вилоятлар кенгашларига раислар сайланди.
Халқ депутатлари Самарқанд вилояти кенгаши раислигига 11-Янгиқўрғон сайлов округидан сайланган депутат, “Нуроний” жамғармаси вилоят бўлими раҳбари Шуҳрат Худойбердиевич Негматов номзоди маъқулланган бўлса, Хоразм вилоят кенгашига 14-Ғазовот сайлов округидан сайланган депутат, кенгаш котибият мудири Алтибай Раджабов раис этиб сайланган.
Шунингдек, Жиззах вилояти кенгаши раислигига 17-Саройлик сайлов округидан сайланган депутат, “Нуроний” жамғармасининг Шароф Рашидов бўлими раиси Парда Шукуров, Навоий вилояти кенгаши раислигига эса 30-Тамабаҳрин сайлов округидан сайланган депутат, Ўзбекистон маҳаллалар уюшмаси Навоий вилояти бошқармаси бошлиғи Алиев Ғофир Қувватович сайланди.
Аввалроқ Олий Мажлис Қонунчилик палатаси спикери ўринбосари Одилжон Тожиев янгиланган конституцияга асосан эндиликда ҳокимлар маҳаллий кенгашларга раис бўлолмаслигини эслатганди.
Изоҳ (0)