Олий Мажлис Қонунчилик палатасининг 85 фоиз депутатлари эмланган. Бу ҳақда қуйи палата ахборот хизмати хабар қилди.
16 август куни бўлиб ўтган Олий Мажлис Қонунчилик палатаси мажлисида Қонунчилик палатаси спикери Нурдинжон Исмоилов вакцинация жараёни ҳақида фикр билдириб ўтди.
Маълум бўлишича, Ўзбекистон Олий Мажлис Қонунчилик палатаси спикери ва унинг ўринбосарлари тўлиқ эмланган.
Шунингдек, Қонунчилик палатасининг 85 фоиз депутатлари вакцина олган бўлиб, 10 фоизининг эмланиши шифокор кўрсатмасига асосан кейинроққа қолдирилган, қолган депутатлар эса шу кунларда вакцина олиши кутилмоқда.
Бундан аввал Ўзбекистонда ҳарбий хизматчиларнинг қарийб 100 фоизи COVID-19 га қарши эмлангани, Ўзбекистонда коронавирусга қарши 11,3 млн дозадан ортиқ вакцина қўлланилгани ҳамда бош вазир ўринбосари Сардор Умурзоқов коронавирусга қарши Moderna вакцинаси билан эмлангани ҳақида хабар берилганди.
Изоҳ (0)