Жанубий Кореяга сафар қилган Ўзбекистон Олий Мажлиси Қонунчилик палатаси спикери Нурдинжон Исмоилов 23 февраль куни Жанубий Корея бош вазири Ли Нак Ён билан учрашди. Бу ҳақда палата ахборот хизмати хабар бермоқда.
Бош вазир Ли Нак Ён бугунги кунда Ўзбекистон Президенти Шавкат Мирзиёев томонидан олиб борилаётган мамлакатни ривожлантиришга қаратилган кенг кўламли инновацион ёндашувлар ва уларнинг натижаларини юксак баҳолаб, ўзаро дўстона мулоқот ва ҳамкорликни янада ривожлантиришга тайёр эканлигини маълум қилди.
Спикер Исмоилов Ўзбекистон Президентининг 2017 йилда Кореяга амалга оширган ташрифидан сўнг икки мамлакат ўртасидаги алоқалар янги босқичга кўтарилганини таъкидлаб, Жанубий Кореянинг илғор тажрибаси ва технологияларини жорий этиш орқали икки томонлама иқтисодий ҳамкорлик суратлари янада ўсаётганини эътироф этди.
Жанубий Корея бош вазири Президент Шавкат Мирзиёев ташаббуси билан Тошкент шаҳрида «Сеул кўчаси»нинг ва «Корейс маданият ва санъат уйи» очилиши икки халқлар ўртасидаги дўстона алоқаларни янада ривожланишига катта ҳисса қўшишини таъкидлаб, Ўзбекистонда яшаётган корейс миллати вакиллари учун яратилган барча шароитлар учун ўз миннатдорчилигини билдирди.
Тадбир якунида Нурдинжон Исмоилов Жанубий Корея бош вазирини Пхёнчхандаги қишки Олимпия ўйинлари юқори савияда ташкил этилганлиги билан табриклаб, Президент Шавкат Мирзиёев ташаббуси асосида Жанубий Корея фуқаролари учун визасиз тартибнинг ўрнатилиши икки давлат ўртасидаги ўзаро ҳамкорлик алоқаларининг янада ривожланишига хизмат қилишини таъкидлади.
Изоҳ (0)