Ҳиндистон шимолидаги Уттар-Прадеш штатидаги шифохонанинг неонатал бўлимида юз берган ёнғин оқибатида камида 10 нафар янги туғилган чақалоқ ҳалок бўлди. Бу ҳақда маҳаллий ҳукумат хабар берди.
Уларнинг сўзларига кўра, бир кун аввал тунда Жанси шаҳридаги Маҳарани Лакшми Бай тиббиёт коллежининг неонатал реанимация бўлимида ёнғин содир бўлган.
“Еттита жасаднинг шахси аниқланди. Учтасининг шахси ҳали аниқланмаган”, деди штат бош вазир ўринбосари Бражеш Патҳак журналистларга.
Ҳиндистоннинг Times Nоw нашрига кўра, яна 16 нафар чақалоқнинг аҳволи ўта оғир даражада. NDTV телеканали маълумотларига кўра, ёнғин бошланганда неонатал реанимация бўлимида 54 нафар чақалоқ бўлган.
AFP'нинг қайд этишича, ёнғинлар Ҳиндистонда ёмон қурилиш амалиёти, одамларнинг ҳаддан ташқари кўплиги ва хавфсизлик қоидаларининг ёмонлиги туфайли тез-тез учраб туради.
Ёнғинга қисқа туташув сабаб бўлган бўлиши мумкин
Маҳаллий маъмурият расмийси Авинаш Кумарнинг айтишича, ёнғиннинг тахмин қилинган сабабларидан бири қисқа туташувдир.
“Биз ёнғин сабабларини ўрганиш учун қўмита туздик”, деди расмийлар.
Ҳиндистон бош вазири Нарендра Моди воқеани “юракни эзувчи” фожиа деб атади.
“Бегуноҳ фарзандларини йўқотганларга чуқур ҳамдардлик билдираман. Худодан уларга бу катта йўқотишни кўтаришга куч-қувват беришини сўрайман”, деб ёзди у Х'даги саҳифасида.
Уттар-Прадеш бош вазири Ёги Адитянатҳ қурбонларнинг оилаларига 500 000 рупий (5 595 евро) товон пули тўлашини маълум қилди.
Изоҳ (0)