Ҳиндистон ва Бангладешда “Ремал” циклони оқибатида ҳалок бўлганлар сони 28 май куни 36 нафарга етди. Бу ҳақда Ҳиндистон Табиий офатларни бошқариш вазирлиги тарқатган хабарга асосланиб, CNN нашри хабар берди.
Манбада айтилишича, 1 миллиондан ортиқ фуқаро табиий офат ҳудудларидан кўчириб кетилган. Ҳиндистон ва Бангладешда “Ремал” тропик циклони, кучли ёмғир ва шамол аҳолини қочишга мажбур қилган.
Ҳиндистон табиий офатларни бошқариш вазири Жавед Хон айтишича, биргина Бенгалия штатининг ўзида 7 нафар фуқаро ҳалок бўлган. Шунингдек, Ҳиндистон жанубидаги Телангана штатида етти нафар, шимоли-шарқдаги Мизорам штатида яна 12 нафар ҳамда Бангладешда 10 киши ҳалок бўлгани хабар қилинган.
Ҳодиса оқибатида миллионлаб фуқаролар электр тармоғидан узилиб қолган. Дарахтлар ағдарилиши ва бинолар вайрон бўлиши оқибатида халқаро магистраллар тўсилиб қолган.
“Ремал” циклони маркази Калкутта шаҳридан тахминан 80 километр жануби-шарқда экани билдирилган. Тезлиги эса соатига 135 километрга етган. Айни дамда циклон Ғарбий Бенгалия штати қирғоқлари бўйлаб шимолга томон ҳаракатланмоқда.
Бангладешдаги Монгла ва Payра денгиз портлари ёпилган. Ҳукумат балиқчилар ва бошқа тижорат кемаларига сувга чиқмасликни буюрган.
Олдинроқ Жанубий Осиёда юзага келган “Ремал” циклони оқибатида Ҳиндистон шарқи ва Бенгалияда фавқулодда вазият эълон қилингани ҳақида хабар берилган эди. Ушбу каби циклонларнинг Бенгалия кўрфазида юз бериши иқлим ўзгаришининг оқибати экани маълум қилинган.
Изоҳ (0)