Ҳиндистон ғарбида кўнгилочар боғда ёнғин юзага келиши оқибатида 24 нафар фуқаро ҳалок бўлди. Бу ҳақда Ҳиндистон маҳаллий манбаларига таяниб, Reuters нашри хабар берди.
Ҳодиса Ҳиндистон ғарбидаги Гужарат штати, Ражкот шаҳрида юз берган. Оилавий кўнгилочар масканда кечки пайт катта ёнғин келиб чиққан.
Ражкот тумани маъмурияти ёнғин ҳудудига шаҳардаги барча ўт ўчириш бригадаларини сафарбар қилган. Қурбонлар сони расман 24 та деб эълон қилинган бўлса-да, бу рақам тез орада ўзгариши мумкинлигидан хавотир билдирилган.
“Эътиборимиз қутқарув операциясига ва фуқаролар ҳаётини сақлаб қолишга қаратилган. Биз ушбу ҳодиса учун жавобгар бўлган шахсларга нисбатан қатъий чоралар кўрилишини таъминлаймиз”, — деган Ражкот шаҳри мэри Наяна Педҳадия.
Ёнғин кўнгилочар марказнинг ёпиқ визуал ўйинлар бўлимида келиб чиққан ва тез фурсатда тарқалиб, бино ичи ҳамда атрофини қалин тутун қоплаган.
Шифохона расмийсининг айтишича, баъзи жасадлар таниб бўлмас даражада куйиб кетган. Қурбонларда нафас қисилишидан ўлим юзага келган.
Мамлакат бош вазири Нарендра Моди ҳодисада ҳалок бўлганларнинг оилаларига ҳамдардлик билдирган. Шунингдек, у маҳаллий маъмурият жабрланганларга ёрдам кўрсатиш устида ишлаётганини маълум қилган.
“Ражкотдаги ёнғиндан қаттиқ қайғудаман. Яқинларини йўқотган барчага ҳамдардлигимни билдираман”, — дея пост қолдирган Моди Х тармоғидаги саҳифасида.
Ўт ўчирувчилар ҳудудда ёнғинни назоратга олишга эришган. Гужарат ҳокими Бҳупендра Пател ёнғин сабаблари аниқланмаганини билдирган. Воқеа юзасидан суриштирув махсус тергов гуруҳига топширилган. Гуруҳ икки нафар шахсни ҳодиса юзасидан ҳибсга олган.
Изоҳ (0)