Ҳиндистонда кимё заводида ёнғин чиқиши оқибатида 8 киши ҳалок бўлди

Ҳиндистонда кимё заводида 24 май куни содир бўлган ёнғин оқибатида 8 нафар фуқаро ҳалок бўлди. Бу ҳақда Ҳиндистон маҳаллий нашрларига таяниб, Al Jazeera манбаси хабар берди.

Манбада айтилишича, ёнғин Маҳараштра штатининг Тҳана туманидаги Amudan chemical компаниясида содир бўлган. Завод асосий бўлимларидан бирида аввал кучли портлаш, ундан сўнг эса кенг кўламли ёнғин юзага келган.

Ҳодиса оқибатида 60 нафарга яқин фуқаро жароҳатланиб, шифохонага жойлаштирилган. Беморларда кучли тери куйиши, нафас йўлларининг кимёвий модда таъсирида заҳарланиши ҳолатлари кузатилган.

Полиция завод эгаларига нисбатан қотиллик, жумладан, заҳарли моддалар билан муомала қилишда хавфсизлик қоидаларига риоя қилмаслик бандлари бўйича айблов қўзғатган. Завод раҳбарлари ҳибсга олинган.

Ҳозиргача икки жасаднинг шахси аниқланган. Қолган жасадлар оғир даражада куйиб ҳалок бўлгани боис уларнинг шахсини аниқлаш қийинлашган.

“Биз қурбонларнинг оила аъзоларидан жасадларни аниқлашга ёрдам берадиган ДНК намуналарини тақдим этишларини сўрадик”, — дейилган вилоят тиббиёт бирлашмаси баёнотида.

Маҳаллий нашрлар ёнғинни келтириб чиқарган портлаш тўлқини ниҳоятда кучли бўлганини ёзган. Домбивли шаҳридаги завод жойлашган ҳудудда катта зарба тўлқини юзага келиб, қўшни заводлар ҳамда яқин-атрофдаги аҳоли хонадонларига шикаст етказган.

Қидирув-қутқарув гуруҳлари ёнғин жойида текширувни давом эттираётгани маълум қилинган. Бахтсиз ҳодисани юзага келтирган сабаб аниқланмаган.