Одесса ва Харьковда ракета зарбасидан кейинги ёнғинлар, Николаевда вайрон бўлган университет. Урушнинг 175-кунидан фоторепортаж
17 августга ўтар кечаси Россия қўшинлари Одесса вилояти, Харьков ва Николаевни ўққа тутди. Одесса вилоятидаги дам олиш маркази ва хусусий уйларда кучли ёнғин содир бўлди, Харьковда зарба туфайли 7 киши ҳалок бўлди, Николаевда эса университет биноси зарар кўрди. БМТ бош котиби Антониу Гутерриш Владимир Зеленский ва Туркия президенти Ражаб Тоййиб Эрдўғон билан учрашиш учун Львовга келди. Зеленский Қрим аҳолисини Россия ҳарбий объектларига яқинлашмасликка чақирди. Украина президенти офиси раҳбари маслаҳатчиси Михаил Подоляк Қрим кўпригини бузиш режалари ҳақида маълум қилди. Хитой Ҳиндистон, Беларусь, Мўғулистон, Тожикистон ва бошқа давлатлар қаторида ўз қўшинларини Россиядаги машғулотларга жўнатмоқчи. ХХР бу қарор «ҳозирги халқаро ва минтақавий вазият билан боғлиқ эмас» деб ишонтирмоқда. Meduza урушнинг 175-кунига оид асосий фотосуратларни тақдим этди.
Одесса вилояти
Россия қўшинларининг ракета ҳужумидан кейин бинода юзага келган ёнғин. Россия армияси 17 август куни эрта тонгда Одесса вилоятига ҳужум қилди. Дам олиш масканига иккита ракета келиб тушди, қирғоқ зонасидаги бир нечта хусусий уйлар ҳам зарар кўрди. «Жануб» оператив қўмондонлигига кўра, камида тўрт киши яраланган.Фото: Reuters
Соҳилда ишлаётган ўт ўчирувчилар. Ракета ҳужумидан кейинги ёнғин 600 квадрат метрдан ортиқ майдонни қамраб олди. Ўт ўчирувчилар уни бир неча соатда бартараф қилишга муваффақ бўлди.Фото: Украина ФВДХ
Донбасс шимоли
Северскдаги ҳовлиларидан бирига қўйилган қуёш батареяси, у фронт чизиғидан 6 километр узоқликда жойлашган. Ҳозирда Северск йўналишида шиддатли жанглар кетмоқда. 15 август куни ЛХРнинг Россиядаги элчиси Родион Мирошник Россия қўшинлари ДХР ва ЛХР бўлинмалари билан биргаликда шаҳарни уч томондан тўсиб қўйганини айтганди.Фото: Reuters
Бучалик кишининг дафн маросими, унинг шахсини аниқлаш имкони бўлмаган. У март ойида, шаҳар рус қўшинлари томонидан босиб олинган пайтда ҳалок бўлган. Март ойининг охирида Россия армияси Киев вилоятини тарк этганди. Шаҳарда рус аскарлари томонидан ўлдирилган маҳаллий аҳолининг жасадлари ҳалигача топилмоқда.Фото: EPA
Бучада ҳалок бўлган кишининг қабрига рақамланган хоч ўрнатилмоқда. Бир ойдан ортиқ вақт давомида ишғол остида бўлган шаҳарда аниқ қанча одам ҳалок бўлгани ҳозирча номаълум. Июнь ойи бошида Украина миллий полицияси раҳбари Игорь Клименко Бучанский туманида ишғол пайтида 1137 киши, Бучанинг ўзида эса 461 киши ҳалок бўлганини айтган эди. Ҳисоб-китоблар давом этмоқда.Фото: Reuters
Николаев
Николаевда рус қўшинлари томонидан ўққа тутилган Пётр Могила номидаги Қора денгиз миллий университети аудиторияси. Шаҳар мери Александр Сенкевичнинг сўзларига кўра, ракета ҳужумлари вақтида университетда фақат қўриқчи бўлган — у жароҳат олмаган.Фото: AFP
Қора денгиз миллий университетида ҳужум пайтида китоб жавонидан тушиб кетган китоблар. Маҳаллий ҳокимият маълумотларига кўра, зарба туфайли нафақат университет биноси шикастланган, балки зарба тўлқини университет қаршисидаги уйларга ҳам зарар етказган.Фото: AFP
Харьков
Харьковнинг Салтовский тумани Россия ҳужумидан кейин. Зарба оқибатида турар жой биносида катта ёнғин бошланган. 7 киши ҳалок бўлган, 16 киши яраланган.Фото: Украина ФВДХ
Изоҳ (0)