14 ноябрь куни Нью-Деҳлини қоплаган қуюқ тутун туфайли Индира Ганди халқаро аэропортида 200 дан ортиқ рейслар кечиктирилди.
Бу ҳақда аэропорт сайтида хабар берилди.
Шаҳардаги ҳаво сифати индекси 400 дан ошди, нормал даражада бу кўрсаткич 50 ни ташкил қилиши керак эди. Бу ҳаво ифлосланишининг "оғир" тоифаси ҳисобланади.
Йўлларда кўриш сезиларли даражада қийинлашди. Аэропорт маъмурияти йўловчиларга қуюқ тутун туфайли юзага келиши мумкин бўлган муаммолар ҳақида баёнот берди. Ҳиндистон авиакомпаниялари самолётларнинг учиши ва қўниши кечикиши ҳақида огоҳлантирди.
Кунига 50 та сигарет чекишга тенг ҳаво
Ҳар йили ноябрь ва декабрь ойларида Нью-Деҳлида ҳаво сифати кескин ёмонлашади. Бу пойтахт минтақасига қўшни штатлардаги ўрим-йиғимдан кейин содир бўлади.
Фермерлар, тақиқларга қарамай, тонналаб қуруқ ўтларни ёқиб юборишади. Натижада, қуюқ тутун пастликда жойлашган Нью-Деҳлини қоплайди.
Ҳиндистонлик олимларнинг фикрича, бундай ҳавони ютиш кунига 50 та сигарет чекиш билан баробар. Шифокорлар аҳолига кўчага чиқмасликни, чиқишга мажбур бўлганда, ҳимоя ниқобларидан фойдаланишни тавсия қилди.
Нью-Деҳлидан қолишмаётган Тошкент
Сўнгги вақтларда Тошкент шаҳрида ҳам ҳаво сифатининг ёмонлашиши кўп бора кузатилмоқда. Ҳаво сифати индекси (АҚИ) бўйича жаҳон рейтингида пойтахт Тошкент дунёдаги ҳавоси ёмонлашган шаҳарлар рўйхатида қайд этилмоқда.
Таҳлилларга кўра, шаҳарда атмосфера ҳавосининг ёмонлашувида турғун манбалар ва транспорт воситаларининг улуши юқори ҳисобланади.
"Бугунги кунда Тошкент шаҳри атрофида 1314 гектар майдонда 631 та иссиқхона фаолият юритаётгани, уларнинг 60 фоизи кўмирдан, баъзан эса резина шиналар ва бошқа ёнувчи воситалардан фойдаланаётганини инобатга олсак, шаҳар ҳавосининг ёмонлашувида иссиқхоналарнинг ҳам зарари катта, дейиш мумкин", деилади Экопартия хабарида.
Хабарда Экопартия атмосфера ҳавоси ифлосланишига оид ҳар қандай ҳолатдан хавотирда эканини билдириб, Экология, атроф-муҳитни муҳофаза қилиш ва иқлим ўзгариши вазирлиги ва Бош прокуратура томонидан бу муаммога қарши тезкор чоралар кўриш зарурлигини таъкидлаган.
Шунингдек, бу борада белгиланган тартибда депутатлик сўровини киритишини ҳам маълум қилган.
Изоҳ (0)