“Дарё” нашри 8 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Туркия ва Сурияда зилзила қурбонлари 9 минг кишидан ошди, ҳозирда 70 дан ортиқ мамлакат жумладан Ўзбекистондан қутқарув гуруҳлари жўнатилмоқда
Сўнгги маълумотларга кўра, Туркияда зилзила оқибатида ҳалок бўлганлар сони 7 минг кишидан ошди, яна 50 мингга яқин киши жароҳатланган. Сурияда эса қурбонлар сони 2 500 кишидан ошган, шунингдек, 4 500 дан ортиқ киши турли жароҳатлар олган.
Туркия вице-президенти Фуат Октай маълум қилишича, офат жойида 16 139 та гуруҳ қидирув-қутқарув ишларини олиб бормоқда.
70 дан ортиқ давлат, жумладан, Ўзбекистон қутқарув гуруҳлари ва бошқа кўринишдаги ёрдамни юборди.
Сурия давлат ахборот агентлиги SANA хабар беришича, айни вазиятда ҳукумат назоратидаги Алеппо, Латакия, Хама, Идлиб ва Тартус вилоятларида содир бўлган зилзила оқибатида камида 812 киши ҳалок бўлган.
6 февраль куни Туркияда мамлакат тарихидаги энг кучли зилзилалардан бири содир бўлди ва бу зилзила қўшни Сурияга ҳам таъсир кўрсатди. 8 февраль ҳолатига кўра, сейсмологлар деярли 650 та ер силкинишини қайд этган, уларнинг энг кучлиси 7,6 магнитудали бўлди.
Эрон тарихдаги энг йирик ҳарбий машғулотларга нисбатан йирик ерости базасини очди
Эрон армияси АҚШ ва Исроилнинг қўшма машғулотларига жавобан ўзининг ҳаводаги ҳарбий имкониятларини намойиш қилиш учун йирик ерости базасини очди. Бу ҳақда Al Jazeera хабар берди.
Эрон давлат телевидениеси 7 февраль куни Eagle 44 базасидаги турли хил қирувчи самолётлар ва ҳарбий учувчисиз самолётларни намойиш қилди. Мазкур базанинг қаерда жойлашгани ҳақида маълумот ошкор қилинмаган.
Таъкидланишича, база АҚШнинг стратегик бомбардимончи самолётларидан ташлаб юборилган ўқ-дорилардан ҳимояланиш учун тоғларда жойлашган.
Ёпиқ мажмуа АҚШ ва Исроил минглаб аскар ва ўнлаб самолётлар, денгиз кемалари ва артиллерия тизимларини қамраб олган тарихдаги энг йирик қўшма машғулотларини ўтказганидан икки ҳафта ўтмасдан очилди.
Бу қўшма машғулотлар, ўз навбатида, Эрон ўзининг ҳарбий тайёргарлигини кўрсатиш учун машғулотлар ўтказганидан бир неча кун ўтиб бошланган.
Охирги ойларда Теҳрон ва Москва икки томонлама муносабатларни тез суръатлар билан кенгайтираётгани сабабли, Эрон Россиядан яқинда илғор Су-35 қирувчи самолётларини олиши мумкинлиги ҳақида хабарлар пайдо бўлди.
Эрон ҳарбий амалдорлари самолётга қизиқиш билдирган, аммо етказиб бериш қачон амалга оширилиши ҳақида изоҳ бермаган.
Россия очиқ денгизда нефть экспорти рекордларини янгиламоқда
Ўтган ҳафтада Россиядан денгиз орқали нефть экспорти ҳажми яна рекорд даражага етди. Бу ҳақда “РБК” хабар берди.
Маълумотларга кўра, денгиз орқали нефть ташиш ҳажмининг ўсиши нефть қувурлари орқали Европага экспорт ҳажмининг пасайиши билан деярли тўлиқ қопланди.
Аммо нефть етказиб бериш ҳажми ортишига қарамай, унинг экспортидан Россия бюджети даромадлари камайиб бормоқда. Бу ташқи бозорларда Россиянинг Urals нефтига қўйилган чегирма билан боғлиқ.
Танкерларда ташиладиган Россия нефтининг асосий харидорлари Хитой, Ҳиндистон ва Туркияга айланди. Ҳалигача манзили номаълум бўлган танкерлардаги нефть ҳажми ҳисобга олинса (агентлик уларнинг кўп қисми ушбу мамлакатларга кетишини тахмин қилмоқда), бу ҳудудларда етказиб бериш ҳажми кунига 3,29 миллион баррелга етди.
Болгария Европада денгиз орқали ўтадиган Россия нефтининг ягона олувчиси ҳисобланади. Ушбу мамлакат Европа Иттифоқи томонидан Россия хом ашёсини етказиб бериш эмбаргосидан озод қилинган ягона Европа давлати эди.
Мамлакат молия вазирлигининг хабар беришича, 2023 йил январида Urals нефтининг ўртача нархи бир баррел учун 49,48 долларни ташкил қилган, бу ўтган йилнинг январь ойига нисбатан салкам 2 бараварга кам қиймат.
Айни вазиятда Европа Иттифоқи ва G7 мамлакатлари учинчи давлатларга етказиб берилаётган Россия нефтининг бир баррелига 60 доллардан нарх чегарасини белгилаган.
Ўзбекистонда зилзила содир бўлса, уйларимиз бунга бардош бера оладими?
Қурилиш ва уй-жой коммунал хўжалиги вазирлиги томонидан ташкил этилган матбуот анжуманида журналистнинг “Бизда қурилаётган уйлар қанчалик зилзилага бардошли, тажрибалар ўтказилганми? Неча баллгача кафолат бера оласизлар?”, мазмунидаги саволига қурилиш ва уй-жой коммунал хўжалиги вазири ўринбосарининг жавоб берди ва у ижтимоий тармоқларда кенг муҳокамаларга сабаб бўлди.
Даврон Адилов бу саволга “Мен 36 миллион одам қилаётган ишга кафолат беролмайман. Давлат тарафидан ўрнатилган назорат, жорий қилинган тартиб-қоида ва стандартларга кафолат бероламан. Қурилиш ишларига жавобгар биринчи навбатда объектнинг эгаси, яъни бинони қураётган ъбой отаъ жавобгар”, — деб жавоб берган.
Шундан сўнг вазирлик матбуот хизмати юзага келган ҳолатга муносабат билдириб, видеолавҳада гап қурилишда жавобгар, аввало, буюртмачи экани хусусида борганини маълум қилди.
Таъкидланишича, Шаҳарсозлик кодексининг 5-боб, 26-моддасида қурилишни назорат қилишда функсионал мажбуриятлар белгилаб қўйилган.
Объектларни қуриш чоғида қурилиш устидан давлат назорати, буюртмачининг техник назорати, ишлаб чиқувчининг муаллифлик назорати ва пудратчининг ички назорати бўлиши талаб этилади.
“Таъкидлаш керакки, лойиҳа ташкилотлари томонидан қурилишлар ҳудуднинг 7,8 ва ёки 9 этиб белгиланган сейсмик балига кўра режали лойиҳалаштирилади”, — дея тушунтириш берган вазирлик ўз муносабатида.
Яъни бундай жараёнларда энг аввало бинонинг ёнғин хавфсизлиги ва сейсмик бардошлилиги инобатга олиниши зарур.
Изоҳ (0)