Бангладешдаги норозилик намойишларида бир кунда 109 фуқаро ҳалок бўлди

Бангладешдаги норозилик намойишлари оқибатида 5 август куни мамлакат бўйлаб 109 киши ўлдирилган. Бу ҳақда Al Arabiya нашри хабар берди.

Манбада айтилишича, полициянинг намойишчиларга қатор ҳудудларда ўқ узиши оқибатида норозиликлар ҳар доимгидан ҳам кучайиб кетган. Мамлакатда ҳозирга қадар ҳалок бўлган фуқаролар сони 409 нафарга етган.

Душанба куни ҳалок бўлган фуқароларнинг катта қисми пойтахт Даккадан бўлган. 98 нафар пойтахт фуқаросининг жасадлари оилаларига топширилган. Бангладеш бош вазири Шайх Ҳасина истеъфосидан кейин кучайган норозилик намойишлари ҳали ҳам тўхтамаган.

Ҳарбийлар шаҳарлар бўйлаб ноаниқ комендантлик соати жорий қилган. Тартибсизликларни тўхтатиш мақсадида мобил интернет узилган, Даккадаги бош вазир Шайх Ҳасинанинг қароргоҳига олиб борувчи йўллар ёпиб қўйилган.

Ҳукуматнинг ён бериш ҳақидаги ваъдаларига қарамай, на пойтахтда ва на қўшни вилоятларда тартибсизликлар тўхтаяпти. Аввалига адолатсиз меҳнат квотасини бекор қилишни талаб қилган оломон эндиликда ҳукуматнинг тўлиқ янгиланишини сўрамоқда. Мамлакат элитасининг катта қисми мамлакатни тарк этиб, Ҳиндистон ҳамда Непалга қочган.

Олдинроқ Бангладеш бош вазири Шайх Ҳасина мамлакатдан қочгани маълум қилинган эди. У дастлаб Деҳлидаги Ҳиндон авиабазасига келиб тушган. Эндиликда эса Лондонга қочишга уринаётгани хабар берилган эди.