Жеффериэс инвестиция банки таҳлилчилари маълумотига кўра, янги iPhone 17 Pro ва 17 Pro Max моделларининг бошланғич нархи 50 долларга ошади. Бундан аввал смартфонларнинг нархи фақат 2017 йилда кўтарилган эди.
Нархлар ошишига икки асосий омил: биринчидан, қурилма компонентлари таннархининг ортиши, иккинчидан, Хитойдан импорт қилинадиган маҳсулотларга қўшимча божлар жорий этилиши сабаб бўлмоқда. Маcwоrld’нинг ёзишича, Apple ушбу харажатларни қоплаш учун янги нарх сиёсатини жорий қилади. Бунда Ҳиндистондаги янги божхона тўловлари билан боғлиқ қўшимча харажатлар ҳисобга олинмаган.
Apple сўнгги йилларда ишлаб чиқаришнинг бир қисмини Хитойдан Ҳиндистонга кўчиришга ҳаракат қилмоқда. Бу эса логистика, етказиб бериш ва ишлаб чиқариш харажатларида ҳам ўзгаришлар келтириб чиқармоқда. Мутахассислар фикрича, компания заводларини Ҳиндистонга кўчиргани сари у ердаги божхона ва солиқ сиёсати ҳам нарх шаклланишига таъсир қилиши мумкин.
Шу билан бир вақтда Apple сунъий интеллект соҳасидаги фаолиятини янада такомиллаштирмоқда. Компания бош директори Тим Кук сўнгги конференцияда Siri’нинг янада индивидуаллаштирилган версияси устида катта ютуқларга эришилганини маълум қилди. Дастурий таъминот бўйича вице-президент Крег Федериги эса Siri бўйича катта янгиланишлар тайёрланаётганини қайд этди.
Таҳлилчилар башорат қилишича, смартфонлар нархи ошишига қарамай, iPhone 17 сериясига бўлган талаб юқори бўлишда давом этади, чунки Apple ўз флагманларига янги чип, янада кучли камера тизими, тежамкор батарея ва СИ функцияларини қўшиши режалаштирилган. Шунингдек, компания Apple Intelligence платформасини янги авлод iPhoneларида чуқур интеграция қилиши режалаштирилган.
Изоҳ (0)