Машҳур жуфтлик — Майкл Дуглас ва Кетрин Зета-Жонс чорак асрлик фарқ билан бўлса-да, бир кунда 25-сентябрда дунёга келган.
Майкл Голливуд юлдузлари — Кирк Дуглас ва Диана Дилл оиласида туғилган. Бўлажак актёр ўсмирлик чоғида ота-онаси ажрашади. У онаси билан қолган бўлса-да, отасининг ўғлига таъсири катта бўлади: драматик санъат факультетига ўқишга кирганига қарамай, талаба йигит кун кечириши учун пул топиши керак эди. Чунки отаси унга 25 ёшдан олдин кинода карьера қуришга рухсат бермайди.
Майклнинг дебюти “Сан-Франсиско кўчалари” сериалида бўлади. Аммо у бешта “Оскар”га сазовор бўлган “Какку уяси узра парвоз” драмасидаги продюсерлик иши билан бу соҳада ҳурмат қозонади. Кетрин Зета Жонс билан танишган вақтида актёр “Хавфли жозиба”, “Асосий инстинкт”, “Етар, бас” ва “Ўйин” култ фильмлари туфайли машҳур бўлганди. Ёш актриса эса эндигина “Зорро ниқоби” фильмида рол ўйнагани учун ҳам Дугласнинг шахсан ўзи у билан гаплашмоқчи эканлигини билгач, ҳайрон қолади.
Уйланган ошиқ
Майкл Дугласнинг отаси хотинбоз сифатида танилган, аммо оғли узоқ ва мустаҳкам муносабатларга интилган. Шундай қилиб, актёр олти йил Бренда Ваккаро билан яшайди. Кейинчалик улар ажрашгач, актёрнинг ҳаётида дарҳол Диандра Лукер пайдо бўлади. Австриялик дипломатнинг қизи шоу-бизнесга ҳеч қандай алоқаси йўқ эди, ўша пайтда Дуглас учун бу айни муддаодек туюлади. Натижада романтика никоҳга олиб келади, кейин эса ўғли Кемерон туғилади.
Эр-хотин 23 йил бирга яшашди, аммо кейинроқ Майкл бу никоҳ расмий ажралишдан 10 йил олдин бузилганини маълум қилди. Актёр 1998 йилда “Зорро ниқоби”нинг премьерасида Денис де Вито дўстини гўзал Елена ролини ўйнаган актриса билан таништирганида, актёр хотини билан ажрашишини ҳис қилади.
Майкл учун бу бир қарашдаги севги эди, ўзидан 25 ёш кичик актриса билан яккама-якка суҳбатлашиш учун актёр қўлидан келганини қилади.
30 дақиқалик суҳбатдан сўнг, мен унга қараб “Биласанми, мен бўлажак фарзандларингнинг отаси бўлмоқчиман, дедим”, деб тан олади актёр.
Майклнинг муносабати актрисанинг эътиборини тортади, лекин у ҳали ҳам хотинидан ажрашмаганди, бу эса маъшуқа бўлишни истамаган Кетринга ёқмайди. Тўққиз ой давомида севишганлар асосан телефон орқали гаплашиб, соатлаб ҳамма нарсани муҳокама қилишади. Зета-Жонс ўзини фақат шу одам билан яшашга тайёрман, деб ўйлайди, лекин у содда эмасди: Дугласдан хотини билан ажрашишини талаб қилади.
Майкл бунга рози бўлади, гарчи молиявий жиҳатдан унга катта зарар кўрса ҳам: собиқ хотини актёрдан Беверли-Хиллз ва Маллоркадаги уйларини, шунингдек, 45 миллион доллар товон пули талаб қилади. Аммо Дуглас учун янги никоҳи шунга арзирди – 1999 йилда Кетрин ҳомиладор бўлади ва тез орада актёр унга миллион долларлик никоҳ узуги совға қилади.
2000 йилда эр-хотиннинг ҳаётида иккита муҳим воқеа содир бўлади: New Ёрк Plaza меҳмонхонасида бир ярим миллион доллар сарфланган тўй ва уларнинг ўғли Диланнинг туғилиши. Қўшма Штатлардаги мазкур тўй “йил тўйи” деб таъкидланади, чунки келин таблоидларни 250 минг долларлик кўйлаги билан ҳайратда қолдиради.
Қийин даврлар
Кетрин қанча аёл Дугласга эришиш ҳаракатида эканини тушунади, шунинг учун тўйдан олдин ундан никоҳ шартномаси тузишни талаб қилади. Шартнома шартларига кўра, агар Майкл унга хиёнат қилса, рафиқаси билан бирга яшаган ҳар йили учун 2,8 миллион доллар тўлаши керак, беш миллион доллар устамаси ҳам бор. Актёр ҳеч иккиланмай, бу шартларга рози бўлади.
Кўринишидан, Дуглас бунга жон-жон деб кўнади: актёр ўзгариш ниятида эмасди: 2000 йилда уларнинг қизи Карис туғилганда, рафиқаси карьера қураётганда Майкл болаларига ғамхўрлик қилади. Зета-Жонс эрининг қўллаб-қувватлови билан муваффақиятга эришади — у “Чикаго” мусиқий фильмидаги эпизодик роли учун “Оскар” мукофотини қўлга киритади. “Терминал”, “Чидаб бўлмас шафқатсизлик”, “Оушеннинг ўн икки дугонаси” фильмларида рол ўйнайди.
Тўсатдан 2010 йилда Майклга томоқ саратони ташхиси қўйилади. Кетрин қўрқиб кетади: унинг ҳар доим қувноқ эри бирдан ҳолдан тойиб, одатдаги ҳаракатлари унга фақат оғриқ бераётгандек туюлади. Актриса севгилисига ғамхўрлик қилиш учун барча режалаштирилган лойиҳалардан воз кечади. Унинг саъй-ҳаракатлари ва шифокорларнинг ғамхўрлиги самара беради — бир йил ўтгач, касаллик сусаяди.
Аммо синовлар шу билан тугамайди. Майклнинг биринчи турмушидан бўлган тўнғич ўғли гиёҳванд моддаларни сақлаш ва тарқатгани учун олти йиллик қамоқ жазосига ҳукм қилинади. Зета-Жонс шу ерда ҳам мардлик қилади, судда ўгай ўғлини қаттиқ ҳимоя қилади. Кейин эса Кетриннинг ўзида муаммолар пайдо бўлади: касал эри ва Кемерон туфайли стресс остида актрисада биполяр бузилиш ривожланади.
2011 йилда актриса психиатрия клиникасида даволанади, аммо 2013 йилда унинг аҳволи ёмонлашади. Кетринга гипомания ва депрессияни ичига олган 2-тоифа биполяр бузилиш ташхиси қўйилади. Майкл Дуглас хотинининг руҳий тушкунлигидан чарчагани учун ажрашмоқчи эканлигини эълон қилганида пичоқ бориб суякка тақалганди.
Албатта, жамоатчилик бундан норози бўлади, чунки Кетрин қандай қийинчиликлар билан эрини саратон касаллигидан қутқарганини ҳеч ким унутмаганди. Тўғри, бир неча ой ўтгач, эр-хотин яна никоҳ узукларини тақиб, ярашишади. Аммо 2014 йил январида таблоидлар уларнинг ажрашиши ҳақида жар сола бошлайди.
Янги саҳифа
2014 йил охирида матбуот жуфтликнинг ярашганини тасдиқлайди, аммо муносабатларда рашк пайдо бўлади — Кетрин Майклнинг “Чумоли одам” фильмида рол ўйнаган Эванжелин Лилли билан муносабатини ёқтирмасди.
“Улар орасида нимадир бор эди. Дугласни Эванжелиннинг ўша пайтда бошқа эркак билан муносабатда эканлиги ҳам тўхтатолмади. Аммо уйга қайтганида Кетрин унга рашк қилиш қанақа бўлишини кўрсатиб қўйди. Унинг жудаям жаҳли чиққанди. Шундай қилиб, улар яна муаммога дуч келишди”, — дейди улар ҳаётидан хабардор манба Ғарб журналига.
Бироқ Дуглас яна миллионлаб доллар товон пули тўламоқчи эмасди. 2015 йилда Эллен Деженерес шоусида у муносабатлардаги қора чизиқлар тугаганига барчани ишонтиради. “Агар иккалангиз ҳам тайёр бўлсангиз, қийинчиликларни қандай енгишни биласиз. Биз ҳозир ҳар қачонгидан ҳам кучлироқ ва яқинроқмиз. Мен хотинимни ақлдан озар даражада севаман. Ўйлайманки, ҳар бир эр-хотиннинг оғир дамларини бўлади”, — деб таъкидлайди актёр.
Актёр хотинининг “Жанжал” ва “Уэнздей” телесериалларидаги маҳоратига қойил қолади. Шу билан бирга, жуфтликнинг ажралишлари ҳақидаги янги ҳикоялар вақти-вақти билан матбуотда пайдо бўлиб туради.
“Муаммо пайдо бўлганда дарров таслим бўлманг, қўлингиздан келганини қилинг, чунки бу охирги муаммо бўлмайди. Келажакда улар янада кўп бўлади”, — дейди Зета-Жонс узоқ йиллик никоҳни сақлаш сирлари билан ўртоқлашиб.
Изоҳ (0)