Кўплаб машҳурлар карьерасининг бошида рол учун ҳар қандай шартга рози бўлади. Улар режиссёрнинг талабларини сидқидилдан бажаради. Аста-секин актёрлар тажриба орттиради ва нафақат сценарийга ўзгартириш киритиш, балки ташқи кўринишини ўзгартиришдан ҳам бош тортишга журъат этишади.
Керри Фишер — “Юлдузлар жанги. IV эпизод: Янги умид”
Қаҳрамони малика Лея сингари Керри Фишер ҳам темпераментли ва исёнкор эди. “Юлдузлар жанги” фильмини суратга олишдан олдин актрисага 5 кг вазн йўқотиши кераклиги айтилади, бунинг учун “озиш лагери”га юборилади. Аммо қиз ишдан бўшатишларидан қўрқса-да, озишни хаёлига ҳам келтирмайди. Яхшиямки, у лойиҳадан четлаштирилмайди ва унинг ижросидаги Лея образи барча даврларнинг энг яхши фильм қаҳрамонлари рўйхатига киради.
Кирстен Данст — “Ўргимчак одам”
Франшиза продюсерларидан бири Кирстен роли учун беғубор табассумга эга бўлишини таъкидлайди. Бироқ актриса ўзининг номукаммал тишларидан мамнун бўлиб, уларни тузатмоқчи эмасди. Охир-оқибат актрисанинг табассуми фақат фильм постерида таҳрирланган — кадрда ўзининг табиий шаклида қолган.
Алан Рикман — “Гарри Поттер ва тилсим шаҳзода”
“Гарри Поттер ва тилсим шаҳзода”да Северус Снейп Дракони тўхтатиб, Дамблдорни ўзи ўлдирадиган саҳна бор. Расмий сценарийда актёр “Мен сўз берганман, қасам ичганман” дейиши керак эди. Унда Снейпнинг Драко Малфойнинг онасига унинг ўғлига ғамхўрлик қилишга ваъда бергани ҳақида сўз боради.
Бироқ Алан Рикман бу иборани айтишдан бош тортади, чунки унинг фикрича, бу ҳамма нарсани чалкаштириб юборарди. Бунинг ўрнига Снейп жим бўлиб қолади ва икки сўзни айтади: “Авада Кедавра”.
Женна Ортега — “Уэнздэй”
Женна Уэнздей ролига шунчалик киришиб кетадики, ҳатто мустақил равишда баъзи диалогларга тузатишлар киритади. Мисол учун, Қузғунлар балига кийиш учун Қўл Уэнздейга ҳашаматли қора кўйлак совға қилиб, ҳайратда қолдиради. Уэнздей кийимни кўрганда “О, Худойим, бу кўйлак жудаям чиройли, бунинг учун ўзимдан нафратланаман!” дейиши керак эди. Бироқ актриса бу жумла унинг характери учун ғайритабиийлигини ҳис қилади ва буни айтмасликка қарор қилади.
Дэниел Крейг — Жеймс Бонд ҳақидаги фильмлар
2021 йилда Крейг Бонд фильмидаги иштирокини расман якунлади. Шунга қарамай, унинг рамзий 007 образи ҳали ҳам қизғин баҳс-мунозараларга сабаб бўлмоқда. Актёр сочининг ранги энг кўп муҳокама қилинади, чунки Бонднинг олдинги барча ижрочилари қорасоч эди. Крейг сочларини бўяшдан бош тортади. Бунинг ўрнига у шиддатли кўриниш учун калта соч турмагини таклиф қилади.
Кира Найтли — “Герцогиня”
“Герцогиня” драмасида Кира Найтли ҳақиқий тарихий шахс — герцогиня Жоржия Кавендиш ролини ўйнайди. Фильм ижодкорлари фильм постерларида актрисанинг қоматини кўзга ташланарли қилиш таклифини беришади, аммо Кира қоматини фотошоп қилишни қатъиян ман қилади.
Имельда Стонтон — “Гарри Поттер ва қақнус ордени”
Долорес Амбриж образини гавдалантирган Имелда Стонтон махсус қопламалардан фойдаланишни хоҳлайди. У қаҳрамони юмшоқфеъл, мукаммал қад-қоматдан холи бўлиши кераклигини ҳис қилади. Ахир, Амбриж учун ташқи томондан юмшоқ ва меҳрибон кўриниши муҳим эди, шу йўл билан у шафқатсиз ва амалпараст эканини яширарди.
“Гарри Поттер ва қақнус ордени” фильмининг либос дизайнерлари унинг илтимосини ҳеч қандай тортишувсиз қондирадилар. Бел соҳасидаги қўшимча ҳажм туфайли актрисанинг юриши ўрдакка ўхшаб қолади. Имелда эса бундан мамнун бўлади.
Жин Хекман — “Супермен”
1978 йилда суратга олинган “Супермен” фильмидаги Лекс Лютор роли учун Жин Хекмандан сочини олдиришни сўрашганда, актёр қатъиян рад этган. Кейин кино ижодкорлари Хекман қаҳрамонининг парик кийиши ҳақидаги иллюзия яратишга қарор қилишади. Улар фильм давомида унинг сочларини турли усуллар билан турмаклашади. Актёр фақат битта саҳнада кал бўлиб кўринади, аммо бунинг учун у сочини олиши шарт эмасди: визажистлар буни қойилмақом тарзда уддалашган.
Изоҳ (0)