КХДРда Корея Меҳнат партияси Марказий қўмитаси котиби, КМП Марказий ҳарбий қўмитаси раиси ўринбосари Пак Чон Чхонни ўз лавозимидан озод этди. Бу ҳақда Корея Марказий телеграф агентлиги хабар берди. У мамлакатда нуфузи жиҳатидан иккинчи ўринда турадиган ҳарбий мансабдор ҳисобланарди (КХДР етакчиси, олий бош қўмондон Ким Чен Индан кейинги).
Бу лавозимга шу пайтга қадар КХДР мудофаа вазири бўлиб келган Ли Ён Гил тайинланди. Мансабдорлар лавозимларининг ўзгартирилиши сабабларига Шимолий Корея давлат агентлиги аниқлик киритмади.
Reuters қайд этишича, Пхеньян мунтазам равишда ҳарбий ва сиёсий раҳбариятни алмаштириб келади, партия мажлисларида эса тез-тез муҳим сиёсий қарорлар ҳақида эълон қилиб туради.
Пак Ким Чен Иннинг миллий ядровий кучлар потенциалини мустаҳкамлаш нияти ҳақидаги баёнотлари фонида ишдан олинди. Ядровий кучларнинг асосий вазифаси, тийиб туриш ва «тинчликни ҳимоя қилиш» муваффақиятсизликка учраган тақдирда, «мудофаа эмас, бошқача кўринишга эга бўлади», деди у.
Сеулдаги Корея миллий бирлашув институти ходими О Гён Супнинг фикрича, мансабдорнинг истеъфога чиқарилиши яқинда КХДР дронлари чегарани бузиб ўтгани туфайли Шимол ва Жануб ўртасидаги муносабатлар кескинлашуви билан боғлиқдир.
Агентликнинг Сеулдаги манбаларига кўра, бунга жавобан Жанубий Корея чегара орқали учта дрон юборган, аммо Шимол бунга муносабат билдирмаган. О Гён Суп тахмин қилишича, КХДР ҳарбийлари дронларни топа олмаган. «Пак хавфсизликни таъминлаш бўйича операция муваффақиятсизликка учрагани учун масъулиятни ўз зиммасига олган бўлиши мумкин», — деди у.
Изоҳ (0)