15 декабрь куни Бухоро, Наманган ва Хоразм вилоятларида умумий қуввати 500 МВт бўлган 3 та қуёш фотоэлектр станциясини қуриш ва улардан фойдаланиш бўйича ўтказилган тендер танловларида ғолиб инвесторлар аниқланди, деб хабар бермоқда Энергетика вазирлиги матбуот хизмати.
Танлов натижаларига кўра:
Masdar компанияси (БАА) Бухоро вилоятида 250 МВт қувватга эга лойиҳани қуриш ва унда ишлаб чиқарилган электр энергиясининг бир киловатт-соати учун 3,044 АҚШ сенти миқдорида таклифи билан ғолиб бўлди. Мазкур лойиҳа Ўзбекистонда биринчи марта қуввати 62 МВтлик Энергия сақлаш батареяси билан амалга оширилади.
GD Power – Powerchina консорсиуми (Хитой) компанияси Наманган вилоятида 150 МВт қувватга эга лойиҳа учун унда ишлаб чиқарилган бир киловатт-соат электр энергиясини 4,828 АҚШ сентида етказиб бериш таклифи билан ғолиб деб топилди. Ушбу лойиҳа бўйича тарифни оптималлаштириш юзасидан қўшимча музокаралар ўтказилади.
Voltalia компанияси (Франция) компанияси Хоразм вилоятида 100 МВт қувватга эгалойиҳа учун ишлаб чиқарилган бир киловатт-соат электр энергиясини 2,888 АҚШ сентида етказиб бериш таклифи билан ғолиб деб топилди.
Ғолиб бўлган инвесторлар қуёш фотоэлектр станцияларини лойиҳалаш, молиялаштириш, қуриш, фойдаланиш ва техник хизмат кўрсатиш билан шуғулланади. Ғолиблар билан давлат-хусусий шериклик тўғрисидаги ва давлат томонидан қўллаб- қувватлаш тўғрисидаги битимларни 2023 йилнинг 1-чорагида имзолаш ва 2024 йилнинг 4-чорагида ушбу станцияларни ишга тушириш режалаштирилган.
«Ушбу лойиҳа Ўзбекистон ҳукумати томонидан хусусий молиялаштириладиган ва бошқариладиган қайта тикланувчи энергетика лойиҳаларини ривожлантириш орқали яшил энергия ишлаб чиқаришни кўпайтиришга қаратилган саъй-ҳаракатларнинг бир қисмидир.
Шунингдек, бу мамлакатимизга аҳоли манфаатлари учун энергия манбалари нархларини пасайтириш, қазиб олинадиган ёқилғига қарамлигини камайтириш ва энергия ишлаб чиқаришда атмосферага зарарли чиқиндиларни камайтириш бўйича умумий мақсадларимизга эришишга хизмат қилади», — деган Энергетика вазири Жўрабек Мирзамаҳмудов тендер танловида ғолиб инвесторларни аниқлашга бағишланган маросимда.
Молия вазири Темур Ишметовнинг таъкидлашича, авваллари давлат бюджети ёки давлат қарзи ҳисобига қурилаётган электр станциялар сўнгги йилларда хусусий маблағлар ҳисобига қурилмоқда. 2022—2026 йилларга мўлжалланган Янги Ўзбекистоннинг тараққиёт стратегиясида ДХШ тамойиллари асосида 14 миллиард долларлик лой иҳаларни, жумладан энергетика соҳасида 3,2 миллиард долларлик 9 та лойиҳалар амалга оширилиши кўзда тутилган. 2023 йилда яна иккита лойиҳа — қуёш ва шамол станциялари бўйича тендерлар якунланиши кутилмоқда.
Мавзуга доир: Ўзбекистонда қуёш фотоэлектр станцияларини қуриш учун 4 та хорижий компаниядан таклиф тушди
Изоҳ (0)