Келгуси 10 йил давомида АҚШ ташқи қарзи 56 триллион доллардан ошиши мумкин. Бу ҳақда АҚШ Конгресси Бюджет бюроси берган ҳисоботга асосланиб, New York Times хабар берди.
Манбада айтилишича, 18 июнь куни Бюджет бюроси эълон қилган прогнозлар АҚШ учун ўта салбий натижаларни келтирган. Унга кўра, мамлакат қарзи бир ярим баробардан кўпроққа ошиши кутилмоқда.
56 триллион долларлик ташқи қарз 2034 йилда кузатилиши мумкинлиги хабар қилинган. Ҳозирнинг ўзида АҚШда харажатларнинг солиқ тушумларидан ортиқлиги қарзларга қарши миллий иқтисодиётни ҳимоя қилиш ҳаракатини йўққа чиқармоқда.
АҚШда сўнгги йилларда ижтимоий таъминот ва соғлиқни сақлаш соҳасига давлат ёрдами ҳажми ошган. Мамлакатда фоиз ставкалари мунтазам ошиб бормоқда. Бу ҳолатлар эса мамлакат молияси учун оғирлик қилмоқда.
2024 йилда АҚШда бюджет тақчиллиги 1,9 триллион долларга етиши прогноз қилинган. Бу йил бошидаги прогноздан 1,6 триллион долларга кўп. Келгуси 10 йил ичида йиллик камомад 2,9 триллион долларгача ошиши кутилмоқда.
2034 йилга бориб давлат қарзининг иқтисодиётга нисбати 122 фоизга етиши маълум қилинган. Ҳозирда эса бу нисбат 99 фоизни ташкил этади.
Демократлар ҳам, республикачилар ҳам миллий қарз ҳақида хавотир билдирган. АҚШ ҳукумати бундай оғир шароитда ижтимоий харажатларни қисқартириш йўлидан бориши мумкинлиги тахмин қилинган. Чунки мамлакатдаги кўп сонли кексалар ҳамда ногиронлик нафақасини олувчилар давлат бюджетининг катта улушини ўзлаштирмоқда.
Изоҳ (0)