Қозоғистоннинг Манғистов вилоятидаги Каспий денгизи соҳилида мингдан ортиқ нобуд бўлган тюлен топилди. Мутахассислар ўлим сабабларини аниқлай олмаяпти. Бу ҳақда KTK хабар берди.
Маълум қилинишича, дастлабки ҳолатлар уч ҳафта олдин аниқланган. Ўшанда ҳайвонлар Тупқараған туманида топилган, ҳозирда Қорақиян туманида қайд этилган. Ақтауда ҳам алоҳида ҳолатлар кузатилган. Ҳозиргача жами 1034 та тюлен нобуд бўлган.
Ҳайвонларнинг ўлим сабаби ҳали аниқланмаган. Балиқчилик назорати ходимларига кўра, баъзи ҳайвонлар браконерлик тўрларига ўралган ҳолда топилган. Бу тўрлар ҳатто қушларга ҳам хавф туғдиради. Бироқ, бу оммавий қирилишнинг асосий сабаби бўла олмайди.
Оммавий ўлим сабабини аниқлаш устида турли соҳа олимлари бош қотирмоқда. Тюленларнинг кучли чиришга учраши сабабли сифатли таҳлил ўтказиш имконсиз. Шунга қарамай, мутахассислар баъзи нобуд бўлган ҳайвонлардан намуналар олган. Аммо ҳозирча ҳеч қандай версия илгари сурилмаган.
Бундай ишлар вилоят ветеринария хизматлари, Гидробиология ва экология институти, Олмаота шаҳри, Микробиология ва вирусология институти томонидан амалга оширилди. Айни пайтда ушбу экспертларнинг дастлабки хулосалари йўқ. Нима учун — чунки, уларнинг сўзларига кўра, бу узоқ давом этадиган жараён, илмий иш, деб тушунтирди Манғистов вилояти балиқчилик инспекцияси бошқармаси бошлиғи вазифасини бажарувчи Андрей Руцкий.
Изоҳ (0)