Туркманистонда 2024 йилда Каспий денгизи бўйидаги беш давлат ташқи ишлар вазирларининг учрашуви бўлиб ўтади. Бу ҳақда Россия Ташқи ишлар вазирлиги хабар берди.
Бу 5 декабрь куни Москвада бўлиб ўтган навбатдаги минтақавий йиғилишнинг якуний баёнотида маълум бўлди. Каспий денгизи Озарбайжон, Эрон, Россия, Қозоғистон ва Туркманистон қирғоқларини ювади.
Баёнотда беш томонлама битимлар лойиҳаларини мувофиқлаштиришни якунлаш зарурлиги қайд этилган: ҳарбий фаолият тўғрисида; денгиз илмий тадқиқотлари соҳасида; денгиз транспорти соҳасида; сув биологик ресурсларини ноқонуний овлашга (браконьерлик) қарши курашиш; ноқонуний гиёҳванд моддалар савдоси ва денгиз хавфсизлиги.
Томонлар Каспий денгизи саёзлашиши масалалари бўйича ишчи гуруҳ тузиш ташаббусини ҳам қўллаб-қувватлаган.
Учрашувда Туркманистон ташқи ишлар вазири Рашид Мередов иштирок этиб, Каспий денгизида энергия инфратузилмасини яратишни тезлаштирадиган тартиб-қоидаларни якунлашга чақирган.
“Каспий денгизида сувости энергетика инфратузилмасини қуриш қирғоқбўйи давлатларининг иқтисодий эҳтиёжларини қондиради ва энергия ишлаб чиқарувчилар, транзит мамлакатлар ва истеъмолчилар манфаатларини тенг ҳисобга олган ҳолда Евросиёда энергия хавфсизлиги ва барқарорлигини таъминлашнинг муҳим шарти бўлиб хизмат қилади”, — деди дипломат.
Маҳаллий мутахассисларнинг “Дарё”га маълум қилишича, Каспий денгизининг ифлосланиши учун бир қатор сабаблар мавжуд.
“Улар орасида денгиз ва унга туташ ҳудудларда углеводород захираларини ўзлаштириш, қўшни ҳудудларда аҳоли ва саноатнинг кўплиги, қишлоқ хўжалиги мақсадида ерларни интенсив ўзлаштиришиш бор”, — дейди эксперт.
Азиз Бояров
Изоҳ (0)