Украинадаги можаро туфайли жорий қилинган санкциялар Ғарб давлатларига табиий уран етказиб беришни сезиларли даражада мураккаблаштиради. Бу ҳақда Financial Times (FТ) нашрига Қозоғистоннинг Казатомпром миллий компанияси бошқаруви раиси Меиржан Юсупов маълум қилди.
“Биз учун маҳсулотларимизни осиёлик ҳамкорларга сотиш анча осон. Улар деярли барча маҳсулотларимизни сотиб олишлари мумкин. Уларга сотиш анча осон, лекин биз “барча тухумларимизни битта саватга жойламоқчи” эмасмиз. Биз савдо географиясини диверсификация қилишга жуда жиддий қараймиз”, таъкидлади Меиржан Юсупов.
Нашрнинг таъкидлашича, акциялари Остона ва Лондонда жойлашган “Казатомпром” Хитой, Қозоғистон, Каспий денгизи, Озарбайжон, Грузия орқали ўтувчи Транскаспий халқаро транспорт йўлаги бўйлаб етказиб беришни кенгайтиришга интилмоқда.
Financial Times таъкидлашича, компания ўтган ой 2025 йил учун ишлаб чиқариш прогнозини 17 фоизга қисқартирган ва 2026 йил учун прогнозни тўхтатган. Меиржан Юсупов ўз интервьюсида уран қазиб олиш учун зарур бўлган сулфат кислота танқислиги ҳамда қуруқликдаги иншоотлар ва инфратузилма қурилишидаги кечикишларни тилга олди.
Охирги йиллик ҳисоботга кўра, ўтган йили “Казатомпром” ураннинг 49 фоизини Осиё бозорига, 32 фоизини Европага ва 19 фоизини Америка бозорига жўнатган.
Қозоғистон миллий компанияси дунёдаги энг йирик табиий уран ишлаб чиқарувчилардан бири бўлиб, барча уран маҳсулотларининг 43 фоизи мазкур компания ҳиссасига тўғри келади.
Изоҳ (0)