Қозоғистон Республикаси Жамбил вилояти Тарас шаҳридаги хонадонларнинг бирида икки аёлнинг жасади топилган. Бу ҳақда KTK телеканали сайти хабар берди.
Маълумотларга кўра, жасадлар Тараснинг гавжум туманларидан биридаги кўп қаватли уйдан топилган. Ҳалок бўлганлар 46 ва 54 ёшда бўлиб, улардан бири Олмаотадан Тарасга келган.
Қўшниларнинг айтишича, аёллар тахминан бир йилдан бери ижарада яшаб келган, хушмуомала бўлишган ва ҳеч қачон шикоятларга сабаб бўлмаган. Аммо уларни ким ва нима учун шундай ваҳшиёна ўлдирганини ҳеч ким билмайди. Ҳозирда қотиллик содир этилган жой муҳрланган, полиция эса жиноятчини топишга ҳаракат қилмоқда.
“Қотиллик ҳолати бўйича суд олдидан тергов бошланди. Воқеа жойига тезкор-тергов гуруҳи ва Жамбил вилояти полиция департаменти раҳбарияти етиб борган. Гумон қилинувчини аниқлаш ва қўлга олиш учун барча зарур тергов-тезкор чоралар кўрилмоқда. Қозоғистон Республикаси Жиноят-процессуал кодексининг 201-моддасига кўра, бошқа маълумотлар ошкор қилинмайди”, дейди полиция.
Маълумот учун, Қозоғистон Республикаси Жиноят кодексининг 99-моддасига кўра, қотиллик учун 8 йилдан бошлаб умрбод озодликдан маҳрум қилиш жазоси тайинланади. Шунингдек, жиноятчи муайян лавозимларни эгаллаш ёки муайян фаолият билан шуғулланиш ҳуқуқидан умрбод маҳрум этилиши ва мол-мулки мусодара қилиниши мумкин.
Изоҳ (0)