Демократик партиядан президентликка номзод Камала Ҳаррис агар у ғалаба қозонса, Овал кабинетга вазифалар рўйхати билан келишини, республикачи рақиби Дональд Трамп эса ўз душманлари рўйхати билан келишини айтди.
Аввалроқ Трамп, агар у ғалаба қозонса, 2020 йилги сайлов натижаларини сохталаштиришда иштирок этган сиёсатчилар, амалдорлар ва сайловчиларни тергов қилишга ваъда берган эди. У аввалги сайловлардаги мағлубиятини тан олишни истамаслигини билдирган.
“Трамп бутун вақтини ўзи, норозиликлари, қасос олиш режалари ҳақида гапиришга сарфлайди, у Овал кабинетига душманлар рўйхати билан борса, мен Америка халқи олдидаги вазифаларим рўйхати билан бораман”, деди Ҳаррис V-103 радиостанциясига берган интервьюсида.
У ўзининг сайловолди кампаниясида ўрта синфнинг иқтисодий аҳволини яхшилаш ва инфляцияни пасайтириш учун ҳаракат қилиш ваъдаларини такрорлаган.
Ҳозирда АҚШда президентлик сайловлари бўлиб ўтмоқда. Демократик партиядан вице-президент Ҳаррис, Республикачилар партиясидан эса собиқ президент Трамп вакиллик қилмоқда.
Polymarket букмекерлик агентлиги маълумотларига кўра, Трампнинг президентлик сайловларида ғалаба қозониш эҳтимоли 61 фоизни ташкил этади.
Унинг ҳисоб-китобларига кўра, Трампнинг президентлик учун курашдаги рақиби Камала Ҳарриснинг имкониятлари 39 фоизга баҳоланмоқда. Оқ уй собиқ раҳбарининг ғалабасига тикилган пуллар миқдори қарийб 1,3 миллиард доллар, амалдаги вице-президентники эса 808 миллион доллардан иборат.
Изоҳ (0)