5 ноябрь куни АҚШда бўлиб ўтадиган умумий сайлов олдидан 70 миллиондан ортиқ Америка фуқароси муддатидан олдин овоз берди. Бу ҳақда Флорида штати университети эълон қилган маълумотларда келтирилган.
Ҳисоб-китобларга кўра, 70 053 286 АҚШ аҳолиси муддатидан олдин овоз бериш ҳуқуқидан фойдаланган. Уларнинг 37,4 миллиондан ортиғи сайлов участкаларида шахсан ўзи, 32,6 миллионга яқини эса почта орқали овоз берди.
Қўшма Штатларда рўйхатга олинган сайловчилар сони 168 миллионга яқин. Энг кўп киши Техас (7,9 миллион), Флорида (7,3 миллион) ва Калифорния (6 миллион) штатларида эрта овоз берган.
АҚШда навбатдаги президент сайлови 5 ноябрда бўлиб ўтади. Республикачи Дональд Трамп ва демократ Камала Ҳаррис давлат раҳбари лавозими учун курашмоқда.
Трамп Американинг 45-президенти сифатида 2017-2021 йилларда бу лавозимда фаолият юритган. Камала Ҳаррис эса айни пайтда мамлакат вице-президенти лавозимида ишламоқда.
Изоҳ (0)