Сирдарё вилоятининг Боёвут туманида 13 ёшли мактаб ўқувчиси қотилликка қўл ургани ҳақида хабар берилганди. Бош прокуратура ахборот хизмати қотиллик тафсилотларини очиқлади.
Маълум бўлишича, 2024 йил 18 октябрь куни Боёвут туманида яшаган 23 ёшли эркак мурдаси Гулистон шаҳрининг “Навбаҳор” маҳалласи ҳудудидаги канал ёнидан топилган.
Вояга етмаган Ш.А. (ўғил бола) жорий йил 18 октябрь куни “Дўстлик” ва “К-3” канали оралиғидаги ташландиқ жойдан ўтиб кетаётган вақтида узоқ қариндоши Ф.Ж. уни чақириб, қўлидаги пичоқ билан уни ўлдиришини сўраган. Бола буни рад қилганидан сўнг, Ф.Ж. вояга етмаган Ш.А.ни қўрқитгани боис вояга етмаган бола уни пичоқ билан қасддан ўлдирган, дейилади Бош прокуратура ахборотида.
Марҳум Ф.Ж. руҳий касалликлар диспансерида “параноид шизофрения эпизодик кечиши” ташхиси билан рўйхатда турган.
Ҳолат юзасидан 2024 йил 18 октябрь куни Сирдарё вилояти прокуратураси томонидан Жиноят кодексининг 97-моддаси 2-қисми “в” банди билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)