Шавкат Мирзиёев Татаристоннинг “Дўстлик” ордени билан тақдирланиши, Тошкент шаҳар ҳокимлиги дренаж тизимини яхшилаш учун 6 млрд сўм ажратиши, Навоийда ногиронлиги бор шахсга қамоқ жазоси берилгани юзасидан хизмат текшируви тайинланиши — “Дарё” нашри бугун, 24 октябрда эълон қилинган Ўзбекистоннинг ижтимоий-сиёсий ҳаётига оид эътиборга молик хабарларни бир жойга тўплади.
Шавкат Мирзиёев Татаристоннинг “Дўстлик” ордени билан тақдирланди
Президент Қозон шаҳрига ташриф доирасида Рустам Минниханов билан учрашув ўтказди.
Ўзбекистоннинг Хорватиядаги биринчи элчиси тайинланди
Ушбу лавозимни март ойидан буён мамлакатнинг Венгриядаги элчиси лавозимида ишлаб келаётган Ойбек Шахавдинов эгаллади.
Навоийда ногиронлиги бор шахсга қамоқ жазоси берилгани юзасидан хизмат текшируви тайинланди
Фуқаро 188 прим 2-модда (вояга етмаган шахснинг кўнгил очиш (дам олиш) жойларида тунги вақтда бўлишига йўл қўйиш) ва бошқа моддалар билан айбли деб топилиб, 15 сутка маъмурий қамоқ жазоси тайинланган.
Андижон вилоятига янги прокурор тайинланди
Ушбу лавозимни Бош прокуратура бошқармасида ишлаб келган Муродулло Абдуҳакимов эгаллади.
Хориждаги маҳкумларни Ўзбекистонга қабул қилиш тартиби такомиллаштирилмоқда
Озодликдан маҳрум этилган шахсларни улар жазо ўташини давом эттириш учун, шунингдек, руҳий касалликка чалинганларни мажбурий даволаш учун бериш, қабул қилиш ҳамда рад этиш асослари белгиланмоқда.
Тошкент шаҳар ҳокимлиги дренаж тизимини яхшилаш учун 6 млрд сўм ажратди
Аввалроқ Шавкат Мирзиёев пойтахтнинг дренаж тизими ишига қатъий эътироз билдириб, кучли ёмғир ҳақиқий аҳволни кўрсатганини қайд этган эди.
“Улар ўзини катта оғадек тутяпти” — Бобур Бекмуродов Ўзбекистонга таҳдид қилган айрим рус сиёсатчилари ҳақида
“Бу эскича дунёқараш”, дейди депутат “Дарё” мухбири билан суҳбатда.
Ўзбекистонда дарахтларни кесиш ва қасддан қуритганлик учун жарималар оширилмоқда
Сенат бу кўзда тутилган қонунни кўриб чиқиб маъқуллади.
“Тинч аҳоли, айниқса, болаларнинг бегуноҳ қурбон бўлишини ҳеч қандай сиёсий мақсадлар оқлай олмайди” — Шавкат Мирзиёев
Президент “БРИКС плюс” форматидаги саммитда сўзлаган нутқида Яқин Шарқдаги можарога тўхталди.
“Жаҳон иқтисодиёти ва савдосининг парчаланиб бораётгани тенгсизлик, технологик узилишлар ва протекционизмни кучайтирмоқда” — Ўзбекистон президенти
Ўзбекистон БРИКС сунъий интеллект бўйича Тадқиқот гуруҳининг қўшма лойиҳаларида иштирок этиш ниятида эканлиги айтилди.
Ханой шаҳрида 2025 йили Ўзбекистон — Вьетнам бизнес форуми ва саноат кўргазмаси ўтказилади
Шавкат Мирзиёев Вьетнам бош вазири Фам Мин Тин билан учрашув ўтказди.
Тошкент метроси сайлов куни ўзи ишини 1 соат аввал бошлайди
Шу куни йўналишларда поездлар ҳаракати иш кунлари учун тасдиқланган доимий жадвал асосида ташкиллаштирилади.
Ташқи меҳнат миграцияси агентлиги фаолияти тугатилиб, Миграция агентлиги ташкил этилди
Президентнинг “Миграция жараёнларини бошқариш тизимини ислоҳ қилиш бўйича биринчи навбатдаги чора-тадбирлар тўғрисида”ги фармони қабул қилинди.
Президент бир гуруҳ ички ишлар органлари ходимларини мукофотлади
Зокиржон Алматов “Ўзбекистон Республикасида хизмат кўрсатган ёшлар мураббийси” фахрий унвони билан тақдирланди.
Изоҳ (0)