Самбо бўйича жаҳон чемпиони 29 ёшли Камолиддин Расуловни ўлдирган спортчи Шуҳрат Тўрабоев Жиноят ишлари бўйича Учтепа туман суди ҳукмига кўра 15 йилга қамалди. Марҳумнинг опаси Мафтуна Расулова укасини ўлдирган спортчи етарли даражада жазоланмаётганини айтмоқда.
«Укам Камолиддин Расулов 2021 йилнинг 13 сентябрь куни Учтепа туманида ваҳший қотил — Шуҳрат Тўрабоев томонидан хотинининг кўз ўнгида ўлдирилди. Камолиддин спорт билан шуғулланиши баробарида Давлат хавфсизлик хизмати ходими сифатида ҳам фаолият юритарди. Кўп маротаба Ўзбекистон байроғини жаҳон ареналарида юқори кўтариб, Ватани шаънини муносиб ҳимоя қилиб келаётганди. Укам уюшган гуруҳ томонидан ўлдирилди. Буни биз ўша куни воқеа ёзиб олинган кузатув камераларидан, гувоҳлар гапидан билдик. Суд эса бир нафар жиноятчига 15 йил озодликдан маҳрум қилиш жазосини тайинлаб, жиноятчиларнинг етарлича жазоланмаслигига сабаб бўлмоқда», — дейди марҳум спортчининг опаси Мафтуна Расулова.
Марҳумнинг опаси Жиноят ишлари бўйича Учтепа туман суди адолатли ҳукм ўқиб, бегуноҳ инсонни ўлдирган киши қандай жазоланишини кўрсатиб қўйиши керак эканлигини, бироқ суд қотилликка адолатли баҳо бермаганини айтмоқда.
«Биз суд терговидан норозимиз. Сабаби кузатув камераларида пичоқланган укамни қувлаганлар икки киши экани, қотилнинг ёнида югураётган шахс акасиман дея ўзини таништирган Й.Т. эмас, аслида қотилнинг шериги экани айтиляпти. Ва видеодаги киши ва судда гувоҳлик берган акани солиштириб кўрганимизда, улар умуман бошқа-бошқа одамлар экани кўриняпти. Аммо суд бунга эътибор қаратмади. Нусратилло исмли гувоҳни ҳам суд терговига олиб келмади. Улар гувоҳни чақирдик, аммо келмади, келмаса нима ҳар дердик, дея чекланяпти. Нега суд гувоҳни суд залига чақириб ололмаяпти. Шуми давлатимизнинг қонуни? Шуми суднинг адолати?», — дея эътироз билдирмоқда марҳумнинг опаси.
«Дарё» суд терговига келмаган Нусратилло исмли гувоҳнинг прокуратура терговида айтган кўрсатмалари билан танишди.
«2021 йилнинг 13 сентябрь куни кечки пайт тахминан соат 21:00 да онам билан телефон орқали гаплашиб тургандим. Мендан 50-100 метр узоқликда икки киши ўзаро суҳбатлашиб, тортишиб қолди. Шунда спорт кийимидаги бўйи узун йигит ошхона пичоғи билан шеригини жароҳатлади. Пичоқдан жароҳатланган йигит эса бироз қочиб, сал нарироққа кетди. Пичоқ кўтарган йигит эса унинг ортидан етиб олиб, елкасидан ушлаб, унинг қорин соҳасига яна икки марта пичоқ урди. Пичоқдан жароҳатланган йигит бақириб, ҳаммадан ёрдам сўради. Шу пайт мен уларнинг олдига югуриб бордим. Шунда пичоқ кўтарган йигит аралашмаслигимни айтиб, кет йўқол, дея бақирди. Мен сал ортга қайтганимни кўргач, қўлидаги пичоқни яна яраланган шеригининг қорнига тиқди. Бу сафар пичоқ охиригача кирди. Пичоқдан яраланган йигит янаям қаттиқ бақириб, ёрдам сўради ва қоча бошлади. Пичоқ кўтарган йигит эса яна уни қувламоқчи бўлиб турганида, менга кейинчалик таниш бўлган унинг акаси келиб, пичоқ кўтариб олган укасини тўхтатди. Шунда шеригини пичоқлаган йигит бу лаҳзани олти ойдан бери кутиб юрганини айтди ва воқеа жойидан қоча бошлади. Мен эса унинг ортидан қувиб, уни оёғига чалиб, йиқитдим. Қочмаслигини, бўлар иш бўлганини, энди қилган ишига жавоб ҳам бериши кераклигини айтдим», — деган прокуратура терговидаги саволларга жавоб берган гувоҳ.
Тергов ҳужжатларида ёзилишича, спортчини ўлдирган Шуҳрат Тўрабоев дастлабки кўрсатмасида Камолиддин Расуловни ўлдиришни ният қилганини, шу мақсадда уни излаганини, 2021 йилнинг 13 сентябрь куни ҳам соат 14:00 дан бошлаб унинг изига тушиб, соат 21:30 да топгач, ўлдирганини баён қилган.
«Қотиллик келинимизнинг кўз ўнгида содир бўлди. Шу воқеа сабаб келинимиз анча пайтгача шок ҳолатида юрди. Бу эса жиноятни оғирлаштирувчи ҳолат сифатида баҳоланиши керак эди. Қолаверса, бу қотил аввал ҳам суднинг қора курсисига ўтирган. Хулоса чиқармаган. Бу сафар ҳам у қотиллик қилганидан, бегуноҳ инсонни ўлдирганидан афсусланмаяпти. Буни суд якунида сўнгги сўзида ҳам айтмади. Ҳатто гапирмади ҳам. Демак, бу 15 йиллик жазони катта тахмин билан яна 5-6 йил ўтаб чиқиб келади ва яна қотилликлар қилади», — дейди Мафтуна Расулова.
Камолиддин Расулов ўлимида айбли деб топилиб, 15 йил муддатга қамалган Шуҳрат Тўрабоевнинг яқинлари «Дарё» мухбири билан суҳбатда айни дамда тушкун ҳолатдалигини, Шуҳрат Тўрабоевнинг айбида уларнинг иштироки йўқлигини, бироқ буни тушунмаган марҳумнинг яқинлари уларни ҳақорат қилишдан тўхтамаётганини айтмоқда.
Эслатиб ўтамиз, самбо бўйича жаҳон чемпиони 29 ёшли Камолиддин Расулов 2021 йилнинг 13-сентябр куни соат 21:30 да Тошкент шаҳрининг Учтепа туманидаги кўп қаватли уйлар олдида бошқа бир спортчи томонидан пичоқлаб ўлдирилганди. Бош прокуратура ахборот хизматининг расмий маълумотида чемпион йигитнинг пичоқланишига унинг гумонланувчи танишига «Ҳумо Троп» витаминини тавсия қилгани, оқибатда эса гумонланувчининг соғлиғи ёмонлашгани, шифокорлар бу касалликнинг давоси йўқлигини билдиргани хабар берилганди. Жиноят ишлари бўйича Учтепа туман суди мазкур қотиллик воқеасини 2022 йилнинг 8 февраль кунидан бошлаб кўра бошлади. Мазкур судда сўз олган Шуҳрат Тўрабоев марҳум Камолиддин Расулов тавсия қилган витаминни айтилган миқдордан кўра кўпроқ истеъмол қилгани сабаб соғлиғи ёмонлашганини, кечалари иссиғи чиқиб, ухлолмайдиган бўлиб қолганини айтди. Марҳумнинг хотини Гулноза Холмуродова эса қотиллик унинг кўз ўнгида содир бўлганини, қотиллик содир бўлган пайтда ҳаммадан ёрдам сўраб, чақирганини аммо ҳеч ким, ҳатто ППХ ходимлари ҳам унга ёрдам бермаганини айтганди. Судда сўз олган яна бир гувоҳ А.Қ. «Ҳумо Троп» витамини ҳақида гап очиб, таниши Шуҳрат Тўрабоевнинг соғлиғи шу витамин сабаб ёмонлашганини билдирди. ППХ ходимлари эса воқеа жойига етиб борганида Шуҳрат Тўрабоев улардан қочиб, кўп қаватли уй подездига яширинганини маълум қилганди.
Изоҳ (0)