“Дарё”да Қашқадарё вилоятининг Шаҳрисабз шаҳридаги кафеда ўзаро келишмовчилик сабаб фуқаро ўқотар қуролдан отилгани, воқеа юзасидан жиноят иши қўзғатилгани ҳақида хабар берилганди. “Olamsport.com” маълумотига кўра, марҳум Тўра Авлоқулов фахрийлар ўртасидаги жаҳон чемпионатининг олтин медали совриндори бўлган.
Қотиллик воқеаси 2024 йилнинг 29 март куни тахминан 19:30 да содир бўлган.
Билдирилишича, улфатлар кафеда спиртли ичимлик истеъмол қилиб, маст ҳолда базм пулини тўлаш устида тортишиб қолган.
Ш.У. таниши Тўра Авлоқуловга йўлда келаётган пайтда 50 минг сўм пул берганини, шу боис овқатланиш харажатини тўлиқ тўлашини айтган. Спортчи эса унга ҳамма пулни тўламаслигини билдириб, ундан олган 50 минг сўм пулни қайтариб берган. Ш.У. пулни олмасдан унга “Пулни чўнтагингга солиб қўй”, дея жаҳл қилиб, автомобилидаги темир қувурдан қўлбола усулда ясалган қуролни олиб, шеригининг бошига бир марта ўқ узган. Ҳамда воқеа жойидан кетиб қолган. Натижада Тўра Авлоқулов олган тан жароҳати оқибатида Шаҳрисабз шаҳар тиббиёт бирлашмаси шошилинч тез тиббий ёрдам бўлимига ётқизилган, — дейилади Бош прокуратура ахборот хизмати маълумотида.
Спортчи кўп ўтмай, шифохонада вафот этган.
“Olamsport.cоm”нинг ёзишича, марҳум Тўра Авлоқулов 2023 йили Остона шаҳрида ўтказилган фахрийлар ўртасидаги жаҳон чемпионатида иштирок этиб, 55-59 ёшли спорт усталари ўртасидаги баҳсларда олтин медални қўлга киритган.
Мазкур ҳолат юзасидан Шаҳрисабз туман прокуратураси томонидан фуқарога нисбатан Жиноят кодексининг 25,97-моддаси 2-қисми “д” ва “л” бандлари (безорилик оқибатида, бошқа шахсларнинг ҳаёти учун хавфли бўлган усулда қасддан одам ўлдириш) билан жиноят иши қўзғатилиб, Жиноят-процессуал кодексининг 221-моддаси тартибида ушланган. Тергов ҳаракатлари олиб борилмоқда.
Изоҳ (0)