«Даҳшатли қотиллик кўз ўнгимда икки киши томонидан содир этилди. Аммо иккинчи шахс судда кўринмаяпти». Марҳум спортчи Камолиддин Расуловнинг хотини қотиллик воқеаси ҳақида

Марҳум спортчи, 2012 йилда ўтказилган самбо бўйича ўсмирлар ўртасидаги жаҳон чемпионати ғолиби Камолиддин Расулов ўлими юзасидан 2022 йилнинг 8 февраль куни бошланган суд мажлиси 4 март куни ўз ишини давом эттирди, дея хабар берди «Дарё» мухбири.

Судда сўз олган марҳумнинг хотини Гулноза Холмуродова прокурорнинг саволига жавоб берар экан, даҳшатли қотиллик кўз ўнгида содир этилганини, қотиллик воқеасида икки киши иштирок этганини, аммо иккинчи киши судда кўриниш бермаётганини айтмоқда.

Суд ишида қатнашаётган прокурор марҳумнинг хотинига юзланиб, «акаси билан қотиллик содир этди деганингиз нимаси, акасининг қотиллик воқеасида қандай иштироки бор?», деб сўради.

«Воқеа содир бўлган куни тергов пайтида бунинг акаси экани айтилган одам қотиллик содир этилаётганда Камол акамнинг қўлидан ушлаб, қотиллик содир этаётган укасига кўмак берди. Унга ёрдамлашди. Қолаверса, суд мажлисларида ‘мен акасиман’ дея гувоҳлик берган киши воқеа содир бўлган кундаги инсондан умуман фарқ қилади. Ўша куни мен кўрган одам бошқа эди. Унинг бўйи паст ва гавдали, қотилликда айбланаётган одамга ўхшаш гавдали одам эди. У суд бошланганидан бери кўриниш бермади», — дейди марҳумнинг хотини.

Судда таъкидланишича, воқеа гувоҳларидан бири судга такрорий чақиртирилганига қарамай, судга сабабсиз келмаяпти.

«Тергов пайтида воқеа гувоҳи сифатида гапирган киши судга келмаяпти. Унга босим ўтказилган, деган тахминимиз бор. Боиси у воқеа қандай бўлганини, қотиллик неча киши томонидан содир этилганини билади. Кўрган. Суд айнан ўша гувоҳни суд залига мужбурий тартибда бўлса-да, олиб келтириши керак. У инсон терговда айтган маълумотларини судда ҳам айтиб бериши керак», — дейди марҳумнинг хотини Гулноза Холмуродова.

Суд 2022 йилнинг 9 март куни соат 17:00 га қадар танаффус эълон қилди.

Самбо бўйича жаҳон чемпиони 29 ёшли Камолиддин Расулов 2021 йилнинг 13 сентябрь куни соат 21:30 да Тошкент шаҳрининг Учтепа туманидаги кўп қаватли уйлар олдида бошқа бир спортчи томонидан пичоқлаб ўлдирилганди. Бош прокуратура ахборот хизматининг расмий маълумотида чемпион йигитнинг пичоқланишига унинг гумонланувчи танишига «Humo Троп» витаминини тавсия қилгани, оқибатда эса гумонланувчининг соғлиғи ёмонлашгани, шифокорлар бу касалликнинг давоси йўқлигини билдиргани хабар берилганди.

Жиноят ишлари бўйича Учтепа туман судида сўз олган гувоҳ ҳам таниши, судда айбланувчи сифатида иштирок этаётган Ш.Т. марҳум Камолиддин Расулов тавсия қилган витаминни айтилган миқдордан кўра кўпроқ истеъмол қилгани сабаб соғлиғи ёмонлашганини, кечалари иссиғи чиқиб, ухлолмайдиган бўлиб қолганини айтди. Воқеа содир бўлган куни пичоқдан жароҳатланган спортчини икки киши қувлаб кетаётганини жамоатчиликка ошкор қилган «Марказий студия» кўрсатуви мухбирига интервью берган номаълум суҳбатдош эса витаминни қабул қилган спортчига шифокорлар энди ўласан, деб айтишганини, спортчи шу сабаб мен ўлсам, уям ўлади, дея марҳумни пичоқлаганини айтганди.