Ижтимоий тармоқларда бугун, 26 октябрь тунда Президент администрацияси Ахборот сиёсати департаменти собиқ раҳбари Комил Алламжоновга қуролли ҳужум уюштирилгани ҳақида хабарлар тарқалган эди. Мазкур ҳолат юзасидан Бош прокуратура ахборот хизмати изоҳ берди.
Айтилишича, 26 октябрь куни соат 01:40 ларда фуқаро С.С. бошқарувидаги Range Rover русумли автомашина Қибрай тумани, Ифор кўчаси бўйлаб ҳаракатланган вақтида 2 нафар номаълум шахс машинага ўқотар қуролдан бир неча маротаба ўқ узиб, номаълум томонга яширинган.
Ушбу ҳолатда бирор-бир шахс тан жароҳати олмаган. Мазкур ҳолат юзасидан Жиноят кодексининг 25,97-моддаси (қасддан одам ўлдиришга суиқасд қилиш) билан жиноят иши қўзғатилди.
Гумон қилинувчи шахсларни аниқлаш ва ушлаш юзасидан тезкор-қидирув тадбирлари амалга оширилмоқда, дейилади прокуратура ахборотида.
Қўшимча қилинишича, ҳозирда тегишли идораларнинг малакали ходимларидан иборат тезкор-тергов гуруҳи тузилиб, тергов ҳаракатлари олиб борилмоқда.
Аввалроқ Комил Алламжонов бошқа ишга ўтиши муносабати билан Президент администрацияси Ахборот сиёсати департаментининг раҳбари лавозимидан озод этилган эди. У фаолиятини хусусий секторда давом эттиришини маълум қилган.
Изоҳ (0)