Шаҳрисабзда маст фуқаро танишини отиб қўйди

Қашқадарё вилоятининг Шаҳрисабз шаҳрида маст фуқаро танишини отиб қўйди. Қотиллик қўлбола усулда ясалган қуролда содир этилган. Бу ҳақда “Дарё” сўровига жавобан Бош прокуратура ахборот хизмати маълум қилди.  

Аниқлаштирилишича, қотиллик воқеаси 2024 йилнинг 29 март куни тахминан 19:30 да содир бўлган.  

Шаҳрисабз шаҳрининг “Қўшхона” маҳалласида яшовчи Ш.У. 29 март куни соат 15:00 ларда Damas автомобилида кетаётганда ўзига олдиндан таниш бўлган Ш.Р.ни кўриб қолиб, биргаликда “Лола” кафесига борган ва спиртли ичимлик истеъмол қилган. Тахминан бир соатлардан сўнг улар кафедан чиқиб, яна бир таниши Т.А.ни кўриб қолиб, уни ҳам автомашинага миндириб, учаласи спиртли ичимлик истеъмол қилиш мақсадида бошқа кафега борган, — дейилади Бош прокуратура ахборотида. 

Билдирилишича, улфатлар кафеда яна спиртли ичимлик истеъмол қилиб, маст ҳолда базм пулини тўлаш устида тортишиб қолган. 

Ш.У. таниши Т.А.га йўлда келаётган пайтда 50 минг сўм пул берганлигини, шу боис овқатланиш харажатини тўлиқ тўлашини айтган. Шериги эса унга ҳамма пулни тўламаслигини билдириб, ундан олган 50 минг сўм пулини қайтариб берган. У.Ш. пулни олмасдан унга “Пулни чўнтагингга солиб қўй”, дея жаҳл қилиб, автомобилидаги темир қувурдан қўлбола усулда ясалган қуролни олиб, шеригининг бошига бир марта ўқ узган. Ҳамда воқеа жойидан кетиб қолган. Натижада Т.А. олган тан жароҳати оқибатида Шаҳрисабз шаҳар тиббиёт бирлашмаси шошилинч тез тиббий ёрдам бўлимига ётқизилган, — дейди масъул. 

Қўшимча қилинишича, шеригига ўқ узган У.Ш. ҳодиса жойидан қочмоқчи бўлиб, автомобилида кетаётган пайтда воқеа жойидан тахминан 500 метр узоқликда бўлган ИИБ тезкор ходимлари томонидан ушланган. 

Шаҳрисабз шаҳар тиббиёт бирлашмасининг 29 март куни тақдим этилган маълумотномасида Т.А.нинг танасида оғир очиқ тешиб ўтувчи бош мия жароҳати, бош мия ичидаги метал ва суяк парчалари, чап пешона суягининг парчаланиб синган жароҳати, чап қош устида эзилиб йиртилган кўринишида тан жароҳатлари борлиги, аҳволи ўта оғир даражада эканлиги қайд этилган. Мазкур ҳолат юзасидан Шаҳрисабз туман прокуратураси томонидан фуқарога нисбатан Жиноят кодексининг 25,97-моддаси 2-қисми “д” ва “л” бандлари (безорилик оқибатида, бошқа шахсларнинг ҳаёти учун хавфли бўлган усулда қасддан одам ўлдириш) билан жиноят иши қўзғатилиб, Жиноят процессуал кодексининг 221-моддаси тартибида ушланган. Тергов ҳаракатлари олиб борилмоқда, — дейилади Бош прокуратура ахборотида.