Самарқандда январь–октябрь ойларида босқинчилик, талончилик, ўғирлик, фирибгарлик ва безорилик жиноятлари сони ошган

Самарқанд вилояти ҳудудида 2021 йилнинг 10 ойи якунига кўра қайд этилган жами жиноятлар сони 1 830 тага (3487/5317), жиноят қидирув соҳасидаги жиноятлар 1291 тага (1908/3199) ошган. Бу ҳақида халқ депутатлари Самарқанд вилоят Кенгашининг 48-сессиясида Самарқанд вилояти ИИБ бошлиғи полковник Шавкат Раҳмонов маълум қилди, дея хабар бермоқда «Дарё» мухбири.

Жиноят турларидан қотиллик 9 тага (34/43), оғир тан жароҳати етказиш 20 тага (70/90), номусга тегиш 15 тага (35/50), босқинчилик 5 тага (4/9), талончилик 10 тага (10/20), ўғирлик 255 тага (258/513), фирибгарлик 401 тага (431/832), безорилик 32 тага (36/68), йўл транспорт ҳодисалари 257 тага (568/825), ўлим билан боғлиқ йўл транспорт ҳодисалари 56 тага (179/235) кўпайган.

Шунингдек, маст ҳолатдаги шахслар 31 тага (116/147), муқаддам судланганлар 35 тага (266/301), вояга етмаганлар 19 тага (34/53), ёшлар 356 тага (655/1011), хотин-қизлар 100 тага (212/312), ишсизлар 157 тага (421/578) томонидан содир этилган жиноятлар ошган.

Шавкат Раҳмонов маълум қилишича, 2021 йилнинг 10 ойи давомида Самарқанд вилоятидаги 1114 та маҳалланинг 428 тасида жиноят содир этилишига йўл қўйилмаган. 254 тасида жиноятлар сони барқарор сақланган. 432 тасида жиноятлар ошган. Бироқ, ўтган давр мобайнида вилоятдаги маҳаллаларнинг 686 тасида жиноят содир этилишига йўл қўйилган.

Аниқланган ҳолатларнинг 254 таси «сариқ» (жиноят барқарор ва камайган) тоифага ва 432 таси «қизил» (жиноят ошган) тоифаларга ажратилган.

Самарқанд вилоятида жиноят суръати ошган маҳаллалар:

• Жомбой туманида – 52,6 фоизини (38 тадан 20 таси),
• Самарқанд туманида – 45,9 фоизини (74 тадан 34 таси),
• Паст Дарғом туманида – 45,8 фоизини (107 тадан 49 таси),
• Нарпай туманида – 43,9 фоизини (57 тадан 25 таси),
• Пайариқ туманида – 43,1 фоизини (65 тадан 28 таси),
• Оқдарё туманида – 42,9 фоизини (35 тадан 15 таси),
• Каттақўрғон шаҳрида – 41,7 фоизини (36 тадан 15 таси),
• Нуробод туманида – 41 фоизини (39 тадан 16 таси),
• Пахтачи туманида – 39 фоизини (59 тадан 23 таси) ташкил этган.