«Аввалига қочди, кейин ўзи таслим бўлди». Марҳум спортчи Камолиддин Расулов ўлими билан боғлиқ воқеани ўрганаётган судда ИИБ ходимлари кўрсатма берди

Марҳум спортчи, 2012 йилда ўтказилган самбо бўйича ўсмирлар ўртасидаги жаҳон чемпионати ғолиби Камолиддин Расулов ўлими юзасидан 2022 йилнинг 8 февраль куни бошланган суд мажлиси 25 февраль куни ўз ишини давом эттирди, дея хабар берди «Дарё» мухбири.

Навбатдаги суд мажлисида қотиллик содир этилган куни воқеа жойига келган ИИБ ходимлари — Дониёр Раимов ҳамда Мурод Содиқов гувоҳлик берди.

Судда дастлаб Учтепа туман ИИБ пост-патруль хизмати ходими Дониёр Раимов сўз олиб, унга ва шериги Мурод Содиқовга 14- ва 15-даҳалар бириктирилганини, қотиллик воқеаси 14-даҳа ҳудудида содир бўлганини билдирди.

«Мен ва шеригим 14-даҳадан чиқиб келаётганимизда чамаси 20 нафар киши йиғилиб турган экан. Одамлардан пичоқлади, деган гаплар эшитилди. Шунда шеригим қочаётган одамни қувлаб кетди. Мен эса рация орқали бошқаларга хабар бериб, сўнгра машинада шеригим ортидан юрдим. Судланувчи эса ‘дом’га қараб қочди. Сўнгра подъездга кириб кетди. Бироздан сўнг эса ўзи чиқиб, таслим бўлди. Биз эса уни олиб кетдик», — деди ППХ ходими Дониёр Раимов.

Дониёр Раимов айбланувчини қўлга олиб, воқеа жойига қайтишганида марҳум олиб кетилганини билдирмоқда.

«Биз айбланувчини қўлга олиб, воқеа жойига қайтганимизда марҳумни олиб кетишган экан», — деди ППХ ходими.

Судда сўз олган яна бир ППХ ходими Мурод Содиқов айбланувчи воқеа жойидан қочгач, уни қувлаганини айтмоқда.

«Воқеа жойига етиб келганимизда тўпланган одамлар орасидаги кишилардан бири бизни кўриб қочди. Шунда мен уни қувладим. У биздан қочиб, ‘дом’лардан бирининг подъездига кириб кетди ва эшикни ёпди. Тўғриси, аввало шахсий хавфсизлик бўлгани боис одам пичоқлаган кишининг ортидан кирмадим. Шунда унинг ўзи қочиш нияти йўқлигини айтиб, олдимизга чиқиб келди. Биз эса унинг қўлида пичоқ йўқлигига ишонч ҳосил қилгач, уни олиб кетдик», — дейди ППХ ходими Мурод Содиқов.

ИИБ ходимларининг қўшимча қилишича, улар айбдорни қўлга олгач, марҳумни жароҳатлаган пичоғи қаерда эканини сўраган. У эса пичоқни воқеа жойидаги «лоток»ка ташлаб юборганини билдирган.

Эслатиб ўтамиз, мазкур суд мажлисининг 2022 йил 18 февралдаги муҳокамасида сўз олган марҳумнинг хотини Гулноза Холмуродова марҳум эри пичоқлангач, жон талвасасида қочганини, аммо атрофдагилар ёрдам бермаганини айтиб, «кимдир ёрдам берармикан деб, йиғлаб ёрдамга чақирдим, аммо ҳеч ким келмади, ҳатто ППХ ходимлари ҳам қараб туришганди. Ишоняпсизми, ҳеч ким ёрдам бермади. Айбланувчининг акаси воқеа жойига келиб, Камолиддин акамнинг қўлидан ушлаганини, ёрдам бермоқчи экани билан изоҳлаяпти. Аммо нега Камолиддин акам пичоқланиб, бекатда қонга беланиб ётганида ёрдамга келмади», деганди.

Самбо бўйича жаҳон чемпиони 29 ёшли Камолиддин Расулов 2021 йилнинг 13 сентябрь куни соат 21:30 да Тошкент шаҳрининг Учтепа туманидаги кўп қаватли уйлар олдида бошқа бир спортчи томонидан пичоқлаб ўлдирилганди. Бош прокуратура ахборот хизматининг расмий маълумотида чемпион йигитнинг пичоқланишига унинг гумонланувчи танишига «Ҳумо Троп» витаминини тавсия қилгани, оқибатда эса гумонланувчининг соғлиғи ёмонлашгани, шифокорлар бу касалликнинг давоси йўқлигини билдиргани хабар берилганди.

Жиноят ишлари бўйича Учтепа туман судида сўз олган гувоҳ ҳам таниши, судда айбланувчи сифатида иштирок этаётган Ш.Т. марҳум Камолиддин Расулов тавсия қилган витаминни айтилган миқдордан кўра кўпроқ истеъмол қилгани сабаб соғлиғи ёмонлашганини, кечалари иссиғи чиқиб, ухлолмайдиган бўлиб қолганини айтди. Воқеа содир бўлган куни пичоқдан жароҳатланган спортчини икки киши қувлаб кетаётганини жамоатчиликка ошкор қилган «Марказий студия» кўрсатуви мухбирига интервью берган номаълум суҳбатдош эса витаминни қабул қилган спортчига шифокорлар энди ўласан, деб айтишганини, спортчи шу сабаб мен ўлсам, уям ўлади, дея марҳумни пичоқлаганини айтганди.

Судда, шунингдек, воқеа содир бўлган жойда кузатув камерасига тушиб қолган аёл ҳам тингланди. У судга видеотасвирда кўриниб қолгани сабаб тергов ва судга келишга мажбур бўлаётганини, аммо тайинли маълумотга эга эмаслигини билдирди.