Сирдарё вилояти Гулистон шаҳрида холасининг сейфидаги пулларни қўлга киритиш мақсадида келган жиян унинг вояга етмаган ўғлини пичоқлаб ўлдирди. Бу ҳақда Сирдарё вилояти судининг жиноят ишлари бўйича судьяси Бахтиёр Мамадаминовга таяниб, «Сирдарё хабарлари» хабар берди.
Маълум қилинишича, Гулистонда 26 ёшли Б.Х. қиморбозликка берилиб, интернетда қимор ўйинлари ўйнаб, оқибатда 100 миллион сўмдан ортиқ қарзга ботган. У холасининг хонадонида жойлашган сейф ичида тахминан 5 минг доллар борлигини билиб қолиб, уни босқинчилик йўли билан талон-торож қилиш мақсадида режа тузиб олган.
2021 йил 18 март куни Х.Б. ўзи билан ошхона пичоғини олиб, холасининг хонадонига келган. Уйга унинг 2003 йилда туғилган Б.О. исмли ўғлининг рухсати билан кирган. Йигит пешин намози ўқиётганидан фойдаланиб, Х.Б. пичоқ билан жиянига ҳужум қилган.
У йигитнинг кўкрак қафасини олд ва орқа томонларига пичоқ билан 10 марта урган, юз қисмини кўрпа билан ёпиб қасддан ўлдираётган вақтида Б.О.нинг ёрдам сўраб бақирганини эшитган қўшниси хонадонга кириб, содир бўлаётган воқеа гувоҳига айланган.
Б.Х. қўшни аёлга ҳужум қилмоқчи бўлганида, у «милиция чақиришини» айтиб бақирган ва бундан қўрқиб кетган жиноятчи воқеа жойидан қочиб кетган.
Олинган тан жароҳатлари оқибатида вояга етмаган Б.О. 18 март куни шошилинч тез ёрдам илмий маркази Сирдарё вилоят филиалида вафот этган.
Жиноят ишлари бўйича Гулистон шаҳар судида 24 август куни мазкур жиноят иши мазмунан кўриб чиқилиб, Х.Б.га Жиноят кодексининг қатор моддаларига кўра 20 йил озодликдан маҳрум қилиш жазоси тайинланган.
Аввалроқ Навоийда фуқаро куёвини пичоқлаб ўлдириб қўйгани, Наманганда 19 ёшли йигит онасининг норасмий эрини пичоқлагани, Андижонда ака ўгай укаларини чопиб ташлагани тўғрисида хабар берилганди.
Изоҳ (0)