Андижон вилоятининг Избоскан туманида 22 ёшли аёл, уни ҳимоя қилишга уринган онаси ва 12 ёшли укаси ўлдирилгани ҳақида хабар берилганди. Блогер Нурбек Алимовнинг қўшимча қилишича, Бош прокуратура қотиллик воқеасига аниқлик киритган.
Таъкидланишича, қотиллик воқеаси 2022 йилнинг 12 сентябрь куни содир бўлган. Шу куни Избоскан туманининг «Тўрткўл» МФЙ, Олтин водий кўчасида яшовчи фуқаро туман ИИБнинг навбатчилик қисмига қўнғироқ қилиб, қўшнисининг хонадонидан жанжал овозини эшитганини, ҳовлида хонадон эгаси унинг қизи қонга беланиб ётганини айтганини билдирган.
«Аниқланишича, жорий йилнинг 12 сентябрь куни соат 21:30 ларда, Избоскан тумани ‘Тўрткўл’ МФЙ, Хотира кўчасида яшовчи А.А оилавий келишмовчиликлар туфайли онасининг уйида яшаб келаётган турмуш ўртоғи Ш.Р. ва 2021 йилда туғилган фарзанди билан кўришиш мақсадида қайнонасининг уйига борган. Бироқ фарзандини кўришга қаршилик қилганлиги учун қайнонаси М.Р ҳамда турмуш ўртоғи Ш.Р. билан жанжаллашиб қолган. Шундан сўнг сомсахонага бориб, у ердан ўзи билан хўжалик пичоғини олиб келган. Ва қайнонаси, турмуш ўртоғи, шунингдек, жанжалга кейин қўшилган 12 ёшли қайнукасига пичоқ билан жароҳат етказган. Жароҳатлар сабаб унинг қайнонаси ва хотини ҳодиса жойининг ўзида вафот этган. Вояга етмаган Х.Р. эса туман марказий касалхонасига олиб борилган ва шифокорлар томонидан барча тиббий муолажалар амалга оширилмоқда», — дейилади Бош прокуратура маълумотида.
Қайд этилишича, мазкур ҳолат юзасидан вилоят прокуратураси томонидан А.А.га нисбатан Жиноят кодексининг 97-моддаси 2-қисми «а» банди (икки ёки ундан ортиқ шахсни қасддан ўлдириш) билан жиноят иши қўзғатилиб, гумондор ушланган.
Жиноят ишининг тергов ҳаракатлари вилоят прокуратурасининг ўта оғир жиноятларни тергов қилиш бўлими томонидан олиб борилмоқда.
Изоҳ (0)