Андижонда содир этилган мудҳиш қотиллик юзасидан маҳалла масъуллари ва ҳудуд нозирига нисбатан хизмат текшируви тайинланган — Бош прокуратура

Андижон вилоятида эр 22 ёшли аёли, унинг онаси ва укасини ўлдиргани юзасидан маҳалла раиси, хотин-қизлар бўйича фаоллар ҳамда участка инспекторига нисбатан хизмат текшируви тайинланган. Бу ҳақда 3 октябрь куни АОКАда бўлиб ўтган матбуот анжуманида Бош прокуратура бўлим бошлиғи Ўктам Ўтаев айтиб ўтди, дея хабар бермоқда «Дарё» мухбири.

Ўктам Ўтаевнинг маълум қилишича, Андижон ва Тошкент вилоятида оилавий низолар ортидан мудҳиш жиноятлар содир этилишига масъул идора вакилларининг эътиборсизлиги сабаб бўлган.

«Андижон воқеасини оладиган бўлсак: эр-хотин ўртасидаги урушни наҳотки маҳалла билмаган бўлса, наҳотки, участка инспектори билмаган бўлса? Наҳотки, уни нотинч оила сифатида биз назоратга олмаган бўлсак, деган ҳақли савол туғилади. Мана шу ҳолатлар бўйича прокуратура органлари томонидан маҳалла ва оилани қўллаб-қувватлаш вазирлиги вакилларига нисбатан, маҳалла раиси, хотин-қизлар бўйича фаолларга нисбатан хизмат текшируви тайинланди. Шунингдек, ички ишлар органларини участка инспекторига нисбатан хизмат текшируви тайинланди», — деди Бош прокуратура вакили.

У юқорида қайд этилган воқеаларга беписанд муносабатда бўлган масъулларга Президент Шавкат Мирзиёевнинг сўзларини келтириб ўтди.

«Бунақа лоқайдсизлик давлатимиз раҳбарининг табири билан айтганда, «Бизни ислоҳотларимизни амалга оширмасликдаги душман бизни ичимизда». Яъни бу лоқайд, бугунги бўлаётган ислоҳотларга эътиборсиз бўлаётган одамлар ҳисобланади», — деди Ўктам Ўтаев.

Андижон ва Тошкент вилоятида нима бўлган эди?

Андижон вилоятининг Избоскан туманида сентябрь ойи бошида «Тўрткўл» МФЙ Хотира кўчасида яшовчи фуқаро А.А. оилавий келишмовчиликлар туфайли турмуш ўртоғи Р.Ш., қайнонаси Р.М. ва қайнукаси Р.Х. билан жанжаллашиб, уларга пичоқ билан тан жароҳати етказган. Оқибатда турмуш ўртоғи ва қайнонаси ҳодиса жойида, қайнукаси Р.Х. шифохонада вафот этган.

Тошкент вилоятининг Қуйи Чирчиқ туманида эр рашк сабаб хотинини хусусий уй боғчасидаги болалар кўз ўнгида бўғиб, калтаклайди. У орадан кўп ўтмай маст ҳолда аёлининг ота уйига бориб, хотинини пичоқлаб, ўлдиради.