Қорақалпоғистоннинг Нукус шаҳрида уч киши ис газидан заҳарланиб вафот этди. Бу ҳақда “Дарё”га Бош прокуратура матбуот хизмати раҳбари Ҳаёт Шамсутдинов маълум қилди.
18 октябрь куни соат 07:51 ларда Республика шошилинч тиббий ёрдам кўрсатиш маркази Қорақалпоғистон филиали шифокори ИИБга Нукус шаҳридаги хонадонларнинг бирида яшаган 25 ёшли А.Я., унинг 23 ёшли аёли М.Я. ва уларникига воқеадан бир кун олдин меҳмонга келган 27 ёшли эркак А.Т. ис газидан заҳарланиб, вафот этгани ҳақида хабар қилган.
Воқеа жойига тергов-тезкор гуруҳи юборилиб, олиб борилган суриштирув ишлари давомида уч киши уйнинг иситиш қозонхонаси мўрисидан чиққан ис газидан заҳарланиб вафот этгани аниқланган.
Ҳозирда ҳолат юзасидан текшириш ҳаракатлари олиб борилмоқда.
Фавқулодда вазиятлар вазирлиги республика аҳолиси ҳамда ташкилот, корхона ва муассасалар раҳбарларига мурожаат билан чиқиб, кунлар совиши натижасида электр, газ ёки бошқа ёқилғида ишлайдиган иситиш мосламаларидан фойдаланишда эътиборсизлик туфайли ис газидан заҳарланиш, ҳаво-газ аралашмасининг чақнаши ва ёнғинлар содир бўлиши мумкинлигини билдириб, бундай ҳолатларнинг олдини олиш мақсадида тавсиялар берганди.
Изоҳ (0)