Тошкент вилоятида бир қизни зўрлаганликда гумон қилинган Миллий гвардия Қўриқлаш бош бошқармаси ходимига нисбатан жиноят иши қўзғатилгани ҳақида хабар берилган эди. Олий суднинг маълум қилишича, мазкур жиноят иши суднинг иш юритувига келиб тушган.
Унга кўра, Жиноят кодексининг 118-моддаси (номусга тегиш) 4-қисми (ўн тўрт ёшга тўлмаган шахснинг номусига тегиш) билан айбланган Ш.Ш.га (1993 йилда Тошкент вилоятида туғилган, Қибрай тумани Қўриқлаш бўлими сафдор ходими, жиноят содир этилган пайтда ишсиз бўлган, жиноят ишлари бўйича Нурафшон шаҳар судининг 2023 йил 29 июлдаги ажрими билан қамоққа олиш тарзидаги эҳтиёт чораси қўлланган) оид жиноят иши бугун жиноят ишлари бўйича Бўстонлиқ туман судининг иш юритувига келиб тушди.
Қайд этилишича, Жиноят кодексининг 118-моддасида назарда тутилган жиноятлар билан боғлиқ жиноят ишлари Жиноят-процессуал кодексининг 19-моддаси (судда жиноят ишларининг ошкора кўрилиши) талабларига мувофиқ ёпиқ суд мажлисида кўрилади.
Хоразмда оилавий болалар уйи раҳбари уч нафар вояга етмаган тарбияланувчини 10 ой давомида вилоят адлия бошқармаси ва туман фавқулодда вазиятлар бўлими бошлиқлари билан жинсий алоқада бўлишга мажбурлагани ҳақида хабар берилганди. Аввалроқ ушбу ҳолат юзасидан муносабат билдирган Президент администрацияси шўба мудири Саида Мирзиёева қонунчиликда жиддий муаммолар борлиги ва ушбу бўшлиқдан жирканч шахслар фойдаланиб қолаётганини алоҳида қайд этиб, Бош прокуратурадан мазкур ҳолатга алоҳида эътибор қаратиб, синчиклаб ўрганишни ва ҳуқуқий баҳо беришни сўраганди.
Президент администрацияси раҳбари ўринбосари Комил Алламжонов педофилларга нисбатан кимёвий кастрация жазосини қўллаш юзасидан қонунчиликка ўзгартириш киритиш вақти келганини айтганди. Болалар омбудсмани ҳам меҳрибонлик уйи қизларига нисбатан қўлланадиган ҳар қандай жинсий жиноятларга оғир жазо турларини қўллаш керак, деган позицияда.
Изоҳ (0)