“Илм – янги имкониятларнинг, ижодий фикрлашнинг, ҳар бир инсондаги салоҳиятни юзага чиқаришнинг калитидир” — Комил Алламжонов

Қозоғистонда 5 август куни “Заковат” интеллектуал ўйинининг катта чемпионати бўлиб ўтади. Президент Администрацияси Ахборот сиёсати департаменти раҳбари Комил Алламжонов ушбу чемпионат хусусида фикр билдирди.

Унинг ёзишича, ушбу чемпионат минтақада таълимни қўллаб-қувватлашга, ривожлантиришга қаратилган жуда катта, муҳим воқеа бўлади. 

“Ишончимиз комилки, катта муваффақиятларга эришиш учун, ҳар қандай тўсиқларни енгиб ўта олиш учун фақат ва фақат илм ва таълим керак.

Илм – шунчаки фактлар, маълумотлар тўплами эмас. Илм – янги имкониятларнинг, ижодий фикрлашнинг, ҳар бир инсондаги салоҳиятни юзага чиқаришнинг калитидир. Билим ва кўникмаларимиз қанчалик кўп бўлса, тинимсиз ўзгариб турган бу дунёда шунчалик дадил қадам ташлай оламиз. Инсон айнан илму ҳикмат туфайли кучлироқ, ақллироқ бўлиб боради.

Барчани бу муҳим тадбирга қўшилиб, чемпионат иштирокчиларини қўллаб-қувватлашга чақирамиз. Билимларимиз тараққиётнинг, фаровон келажакнинг бош омили бўлсин!

Келинг, илм чўққиларини биргаликда забт этиб, бир-биримизни янги марраларга илҳомлантирайлик!”, дейди Комил Алламжонов.