Жорий йилнинг 23-24 август кунлари Самарқанд шаҳрида халқаро триатлон бўйича анъанавий “Challenge Samarkand-2025” мусобақаси бўлиб ўтди. Мазкур спорт тадбири замонавий “Silk Road Samarkand” туризм мажмуаси ҳудудида ташкил этилди.
Эркаклар ўртасидаги баҳсларда инглиз спортчиси Уилл Дрэпер мутлақ устунликни намойиш этди. У сузиш ва велосипед босқичларида ҳам пешқадамликни қўлдан бой бермай, якунда 3 соат 36 дақиқа 17 сония натижа билан маррани биринчи бўлиб кесиб ўтди. У иккинчи ўринни эгаллаган франциялик Клемент Мигнонни 5 дақиқа ортда қолдирди. Швейцариялик Андреа Салвисберг эса учинчи ўринни эгаллади.
Аёллар мусобақасида испаниялик спортчи Сара Перес Сала баланд тоғ шароитида олиб борган тайёргарлигининг самараси сифатида кучли рақибларини ортда қолдиришга муваффақ бўлди. У 4 соат 2 дақиқа 45 сонияда маррага етиб борди. Иккинчи ва учинчи ўринларни мос равишда германиялик Атина Хемпен ҳамда венгриялик Камил Эслинг эгаллади.
Маълумот ўрнида, Триатлон — бу уч босқичдан иборат спорт тури бўлиб, унда иштирокчилар кетма-кет сузиш, велосипед ҳайдаш ва югуриш орқали белгиланган масофани босиб ўтадилар. Мазкур спорт тури юқори жисмоний тайёргарлик ва бардошлиликни талаб қилади.
Изоҳ (0)